გახარია: სააღდგომო ლიტურგიას თვალყურს სახლიდან ტელევიზორით ვადევნებ

საქართველოს პრემიერ-მინისტრი გიორგი გახარია სააღდგომო ლიტურგიაზე დასწრებას არ აპირებს. ამის შესახებ მთავრობის მეთაურმა ჟურნალისტებს განუცხადა. 

როგორც პრემიერმა განმარტა, ის წირვა ლოცვას სახლიდან, ტელევიზორით ადევნებს თვალყურს. მისივე თქმით, ეს გადაწყვეტილება სამოქალაქო პასუხისმგებლობით არის განპირობებული, რომელიც კორონავირუსის გავრცელების პრევენციას უკავშირდება. 

"ჩვენ ეკლესიასთან ერთად ყოველთვის ვიპოვით იმ დაბალანსებულ გამოსავალს, რომელიც ჩვენი მოქალაქის სიცოცხლისა და ჯანმრთელობის ინტერესში იქნება და ასევე ჩვენი უძველესი ეკლესიის ინტერესსაც გაითვალისწინებს. მე, როგორც ერთი ცალკე აღებული ქრისტიანი, რა თქმა უნდა, ამას ყველაფერს თვალყურს ვადევნებ სახლიდან ტელევიზორით. ეს ჩემი სამოქალაქო პასუხისმგებლობაა, როგორც ცალკე აღებული მოქალაქის, ისევე როგორც მთავრობის ხელმძღვანელის და თითოეულ ჩვენს მოქალაქეს მოვუწოდებ, რომ ყველა მოვიქცეთ ასე. ჩვენ ჩვენი რწმენა შეგვიძლია ისე აღვასრულოთ, რომ დავიცვათ და გავუფრთხილდეთ ჩვენი ოჯახის წევრების, მეზობლების, მშობლების ჯანმრთელობასა და სიცოცხლეს", - განაცხადა გახარიამ. 

შეგახსენებთ, რომ საქართველოში 31 მარტიდან საგანგებო რეჟიმი და ე.წ. კარანტინის საათი მოქმედებს. შესაბამისი გადაწყვეტილება პრემიერ-მინისტრმა გიორგი გახარიამ 30 მარტს, საკოორდინაციო საბჭოს სხდომის ფარგლებში მიიღო. ამ განკარგულების თანახმად, მოქალაქეებს 21:00 საათიდან, დილის 06:00 საათამდე გადაადგილება ეკრძალებათ. გარდა ამისა, მათ სოციალური დისტანცია უნდა დაიცვან და საჭიროების არ არსებობის შემთხვევაში, გარეთ არ გავიდნენ. აღნიშნული გადაწყვეტილება მთავრობამ მას შემდეგ მიიღო, რაც ქვეყანაში კორონავირუსით ინფიცირების შემთხვევების ზრდა დაფიქსირდა. საგანგებო მდგომარეობა ქვეყანაში 21 აპრილამდე იმოქმედებეს.