logo
ENG


ტექნიკური უნივერსიტეტის თანამშრომელმა სხვების ხელფასებით მილიონ ლარზე მეტი მიითვისა - POG

25 მაი 202212:34
3 წუთის საკითხავი
clock 609

პროკურატურამ დიდი ოდენობით თაღლითურად დაუფლების ფაქტზე ტექნიკური უნივერსიტეტის თანამშრომელი დააკავა.

უწყების მიერ გავრცელებულ განცხადებაში ნათქვამია, რომ საფინანსო დეპარტამენტის უფროსი სპეციალისტი სახელფასო ბაზების შევსებისას, ხელფასის დასარიცხად უთითებდა ტექნიკური უნივერსიტეტის თანამშრომლების პირად მონაცემებს, ხოლო მათ სახელფასო ანგარიშის ნაცვლად - საკუთარ საბანკო ანგარიშს, რის შედეგადაც მითითებული თანხები მის ანგარიშზე ირიციხებოდა. 

პროკურატურის ინფორმაციით, თანამშრომელმა ჯამში 1,2 მილიონ ლარზე მეტი მიითვისა.

საქართველოს პროკურატურამ, წინასწარი შეთანხმებით ჯგუფის მიერ, სამსახურებრივი მდგომარეობის გამოყენებით საქართველოს ტექნიკური უნივერსიტეტის დიდი ოდენობით თანხის თაღლითურად დაუფლების ფაქტზე ერთი პირი დააკავა. პროკურატურის ინფორმაციით, ბრალდებული სხვა პირებთან ერთად თაღლითურად დაეუფლა საქართველოს ტექნიკური უნივერსიტეტის კუთვნილ 1 288 000 ლარს.

საქართველოს ტექნიკური უნივერსიტეტის მიერ მოწოდებული, სამსახურეობრივი შემოწმების შედეგად გამოვლენილი დარღვევების ფაქტებზე, დაწყებული გამოძიების შედეგად დადგინდა, რომ ტექნიკური უნივერსიტეტის საფინანსო დეპარტამენტის უფროსი სპეციალისტი - მ.ა. სხვადასხვა პერიოდში, სახელფასო ბაზების შევსებისას, ხელფასის დასარიცხად უთითებდა ტექნიკური უნივერსიტეტის თანამშრომლების პირად მონაცემებს, ხოლო მათ სახელფასო ანგარიშის ნაცვლად - საკუთარ საბანკო ანგარიშს, რის შედეგადაც მითითებული თანხები მის ანგარიშზე ირიციხებოდა.

გარდა ამისა, ბრალდებული ხელფასის გასაწერად შედგენილ დოკუმენტში, ხელფასის დასარიცხად უთითებდა მისი სანაცნობო წრიდან მოძიებული პირების პირად მონაცემებს და საბანკო ანგარიშის ნომრებს, რის შედეგადაც ბრალდებულის ნაცნობ პირებს, რომლებიც არ წარმოადგენდნენ საქართველოს ტექნიკური უნივერსიტეტის თანამშრომლებს, ერიცხებოდათ ვითომდა შრომითი ანაზღაურება. აღნიშნული ქმედებებით, ბრალდებული, დანაშაულებრივი ჯგუფის სხვა პირებთან ერთად თაღლითურად დაეუფლა საქართველოს ტექნიკური უნივერსიტეტის კუთვნილ 1 288 000 ლარს. მ.ა.-ს ბრალდება საქართველოს სისხლის სამართლის კოდექსის 180-ე მუხლის მე-2 ნაწილის „ა“ ქვეპუნქტით და მე-3 ნაწილის „ა“ და „ბ“ ქვეპუნქტით (თაღლითობა, ჩადენილი წინასწარი შეთანხმებით ჯგუფის მიერ, სამსახურებრივი მდგომარეობის გამოყენებით, დიდი ოდენობით) წარედგინა, რაც სასჯელის სახედ და ზომად ექვსიდან ცხრა წლამდე თავისუფლების აღკვეთას ითვალისწინებს.

პროკურატურამ ბრალდებულის მიმართ აღკვეთის ღონისძიების სახით, პატიმრობის შეფარდების შუამდგომლობით თბილისის საქალაქო სასამართლოს უკვე მიმართა. გამოძიება გრძელდება დანაშაულში მონაწილე სხვა პირების გამოვლენის მიზნით"- ნათქვამია განცხადებაში.


close დახურვა