ევროკავშირის საბჭომ უკრაინელი სამხედრო ტყვეებისა და დაკავებული სამოქალაქო პირების მიმართ ჩადენილი ადამიანის უფლებების მძიმე დარღვევების გამო სანქციები 15 ფიზიკურ პირსა და ერთ ორგანიზაციას დაუწესა.
ევროკავშირის განცხადების მიხედვით, სანქცირებულთა შორის არიან რუსეთის ოფიციალური პირები და სასჯელაღსრულების დაწესებულებების თანამშრომლები, რომლებიც უკრაინელი ტყვეებისა და სამოქალაქო პირების წამებაში, არაადამიანურ და ღირსების შემლახავ მოპყრობაში არიან დადანაშაულებული.
სანქციები შეეხო დონეცკის ოლქში მდებარე ოლენივკის ციხის პირველი მოადგილის, დმიტრი ნილოვის, ასევე რუსეთის პაკინოს №7 სასჯელაღსრულების კოლონიის უსაფრთხოების ხელმძღვანელის, ალექსეი ხავეცკისა და რუსეთის ფედერალური უსაფრთხოების სამსახურის (ФСБ) თანამშრომლის, იან ზანევსკის. სანქციების სიაში ასევე მოხვდა ტაგანროგის №2 წინასწარი პატიმრობის იზოლატორი (СИЗО-2), სადაც, ევროკავშირის ცნობით, უკრაინელი სამხედრო ტყვეები, სამოქალაქო პირები, მათ შორის ჟურნალისტები და ქალები, სისტემურ წამებას განიცდიდინენ.
ევროკავშირის საბჭომ დამატებით სანქციები დააწესა რუსეთის უდარნოეს №10 სასჯელაღსრულების კოლონიის ხელმძღვანელს, მის ხუთ მოადგილესა და სამედიცინო ნაწილის ხელმძღვანელზე.
სანქციები ითვალისწინებს აქტივების გაყინვას, ევროკავშირის ტერიტორიაზე შესვლის აკრძალვას და ევროკავშირის მოქალაქეებისა და კომპანიებისთვის მათთვის ფინანსური რესურსების მიწოდების აკრძალვას.
ევროკავშირმა კიდევ ერთხელ დაგმო უკრაინელი სამხედრო ტყვეებისა და დაკავებული სამოქალაქო პირების წამება, არასათანადო მოპყრობა და მკვლელობა და საერთაშორისო ჰუმანიტარული სამართლის დარღვევებზე პასუხისმგებელი პირების ანგარიშვალდებულების უზრუნველყოფისკენ მოუწოდა.
დახურვა