ევროპული საქართველო აცხადებს, რომ პარლამენტის მიერ ეროვნულ უმცირესობებთან ურთიერთობების საბჭოს შექმნა დიასპორის კომიტეტის ბაზაზე ხელისუფლებს არასწორი, პროვოკაციული და სახელმწიფოებრივად გაუმართლებელი ნაბიჯების გაგრძელებაა.
"ეს ნაბიჯები საქართველოს ეთნიკური უმცირესობების წარმომადგენელი მოქალაქეებს უთანასწორო პოზიციაში აყენებს.
ტერმინი დიასპორა ადგილობრივ კონტექსტში უცხო ქვეყნის მოქალაქეთა ჯგუფის აღსაწერად გამოიყენება. საქართველოს ვერცერთი მოქალაქე ვერ იქნება დიასპორა, რადგან თითოეული მათგანი, მიუხედავად მათი ეთნიკური წარმომავლობისა ჩვენი საზოგადოების განუყოფელი ნაწილია.
შესაბამისად, პარლამენტის ეს გადაწყვეტილება ხელისუფლების არასწორი, გამრუდებული წარმოდგენის პროდუქტია, რომელიც საქართველოს ყველა მოქალაქეს თანასწორად არ განიხილავს.
ქართული ოცნება ხელისუფლებაში მოსვლის დღიდან მფარველობს, აძლიერებს და ახალისებს ძალადობრივ ჯგუფებს, რომელთა უმრავლესობა სწორედ ეთნიკურ, რელიგიურ შუღლს აღვივებს. სწორედ ეს კონტექსტი ხდის შემაშფოთებელს ამგვარი კომისიის შექმნას დიასპორის კომიტეტის ბაზაზე". - აცხადებს ევროპული საქართველო.
პარტიის განცხადებაში ასევე ნათქვამია, რომ ხელისუფლების ამ არასწორი დამოკიდებულების ნაწილია ეთნიკურად აზერბაიჯანული მოსახლეობისთვის უარის თქმა, ღირსეულად აღნიშნონ ნოვრუზის დღესასწაული და 1 დღით მაინც მოხსნან კომენდანტის საათი.
"ამისთვის გადაადგილებასთან დაკავშირებით არსებული შეზღუდვების დროებით მოხსნა იყო საჭირო, რაც ხელისუფლებამ უმრავლესობაში მყოფი რელიგიური ჯგუფისთვის უკვე გააკეთა. თუმცა, იმავეს გაკეთება უმცირესობისთვის არ ისურვა. ხელისუფლება ფეხბურთის მატჩზე დასწრების მსურველებს გადაადგილების უფლებას აძლევს, ხოლო იმავეს გაკეთება არ უნდა საქართველოს ათიათასობით მოქალაქისთვის, რომლებიც 21 მარტს ზეიმობენ დღესასწაულს, რომელიც საუკუნეებია, ჩვენს ქვეყანაში აღინიშნება.
ქართული ოცნების ეს პოლიტიკა ერთი მხრივ სამოქალაქო უფლებებს ლახავს, არღვევს სამოქალაქო მშვიდობას, ახალისებს ძალადობრივ სიძულვილის ჯგუფებს, მეორე მხრივ, საფრთხეს უქმნის საქართველოს სუვერენიტეტს და ჩვენი ქვეყნის მტრებს პროვოკაციების მოსაწყობად ხელსაყრელ ნიადაგს უქმნის". - აცხადებს პარტია.
ნოვრუზ ბაირამი აღმოსავლური ერების დიდი ნაწილის ტრადიციული, ეთნიკური ხასიათის დღესასწაულია.
2010 წელს გაეროს გენერალურმა ასამბლეამ ნოვრუზი საერთაშორისო დღედ აღიარა. 2009 წლის 28 სექტემბრის იუნესკოს სამიტზე ნოვრუზი ოფიციალურად იქნა შეტანილი კაცობრიობის არამატერიალური კულტურული მემკვიდრეობის სიაში.
ექსპრეზიდენტის, მიხეილ სააკაშვილის ინიციატივით, 2010 წელს ნოვრუზ ბაირამი საქართველოში საერთო სახალხო დღესასწაულად გამოცხადდა.
დახურვა