თენგიზ ცერცვაძე: კორონავირუსით ინფიცირებულებიდან ერთი პაციენტის მდგომარეობა მძიმეა

ინფექციური საავადმყოფოს დირექტორმა თენგიზ ცერცვაძემ ჟურნალისტებთან საუბარში განაცხადა, რომ ბოლო პაციენტს ვისაც კორონავირუსი დაუდგინდა, შეხება იტალიასთან ჰქონდა. 

ცერცვაძის თქმით, კორონავირუსის დროს ყველაზე სახიფათო პერიოდია პირველი კვირა. 

„აღებული იყო 6 სინჯი და აქედან 5 უარყოფითი იყო და ერთი დადებითი. აღებულია საღამოსთვის კიდევ 4 სინჯი. სხვა ინფორმაციას ვერ გავცემთ, ვცდილობთ დავიცვათ პერსონალური მონაცემები. ყველას იტალიასთან აქვს შეხება, 3 პაციენტის გარდა.

ბოლო პაციენტსაც იტალიასთან ქონდა შეხება. მისი მდგომარეობა დამაკმაყოფილებელია, მხოლოდ მცირე ტემპერატურის მომატება აღენიშნება. 7 პაციენტია ვისაც აქვს პნევმონია, აქედან 1 არის მძიმე მდგომარეობაში. მას ინტენსიური თერაპია არ სჭირდება და იმედია, გამოჯანმრთელდება“, - განაცხადა ცერცვაძემ.

შეგახსენებთ, რომ საქართველოში კორონავირუსით ოფიციალურად 25 პირია ინფიცირებული.