ისრაელის თავდაცვის ძალებმა ირანის სამხრეთში, ასალუიესთან მდებარე „სამხრეთ პარსის“ პეტროქიმიურ კომპლექსზე იერიში მიიტანეს, რაც ქვეყნის ყველაზე მსხვილ ასეთ ობიექტად ითვლება. ინფორმაცია ორშაბათს ისრაელის თავდაცვის მინისტრმა, ისრაელ კაცმა დაადასტურა.
მისი თქმით, ობიექტი ამ დროისთვის ფუნქციონირებას ვეღარ ახერხებს. კაცი აღნიშნავს, რომ ბოლო ორ დღეში განხორციელებულმა დარტყმებმა ირანის ორი ძირითადი პეტროქიმიური ინფრასტრუქტურა მწყობრიდან გამოიყვანა. აღნიშნული ობიექტები, მინისტრის განცხადებით, ქვეყნის პეტროქიმიური ექსპორტის დაახლოებით 85%-ზე იყო პასუხისმგებელი.
„პრემიერ-მინისტრ ბენიამინ ნეთანიაჰუსთან ერთად დავავალეთ ისრაელის თავდაცვის ძალებს, გააგრძელონ ირანის რეჟიმის ინფრასტრუქტურაზე შეტევები,“ - განაცხადა კაცმა.
მისივე თქმით, პეტროქიმიური სექტორი მნიშვნელოვან ფინანსურ რესურსს წარმოადგენს როგორც ირანის სამხედრო ინდუსტრიისთვის, ასევე ისლამური რევოლუციის გვარდიის კორპუსისთვის.
მანამდე, 4 აპრილს, ისრაელის ავიაციამ იერიში მიიტანა მაჰშაჰრის პეტროქიმიურ ზონაზეც, რომელიც ერთ-ერთ მთავარ ცენტრად მიიჩნევა ისეთი ქიმიური მასალების წარმოებისთვის, რომლებიც გამოიყენება ასაფეთქებლების, ბალისტიკური რაკეტებისა და სხვა შეიარაღების შესაქმნელად.
ისრაელის მხარის ცნობით, ავიაიერიშის სამიზნე იყო ერთ-ერთი ძირითადი საწარმო, რომელიც სამხედრო დანიშნულების მასალების წარმოებაში მონაწილეობდა.
დახურვა