აჭარის მთავრობის თავმჯდომარის, თორნიკე რიჟვაძის თქმით, აჭარაში კოვიდინფიცირებულებისთვის 350-ზე მეტი საწოლია მობილიზებული იმ პაციენტებისთვის, რომელთაც კლინიკაში მეთვალყურეობა დასჭირდებათ.
მისივე განცხადებით, ასევე ამოქმედებულია პროტოკოლი, რომლის მიხედვითაც, უსიმპტომო პაციენტებს კოვიდ-სასტუმროებში მკურნალობენ. რიჟვაძე ამბობს, რომ ამ მიზნით კონტრაქტები გაფორმებულია და გამოყოფილია 400-ზე მეტი ნომერი.
რიჟვაძის თქმით, ბათუმის, ქობულეთის და ხელვაჩაურის გარდა, სწავლა 1-ლ ოქტომბრამდე გადაიდება ხულოსა და შუახევშიც.
დღეს, 14 სექტემბერს აჭარაში კორონავირუსის 108 ახალი შემთხვევა გამოვლინდა. გუშინ, 13 სექტემბერს - 88;
როგორც აჭარის, ისე ცენტრალური მთავრობის წარმომადგენლების განცხადებით, არ იგეგმება აჭარის ან ბათუმის ჩაკეტვა, ასევე, საგანგებო მდგომარეობის ან სრული კარანტინის გამოცხადება.
დახურვა