საქართველოს მესამე პრეზიდენტი მიხეილ სააკაშვილი საკუთარი ჯანმრთელობის მდგომარეობასთან დაკავშირებით მიმართვას ავრცელებს და აღნიშნავს, რომ ხერხემალზე დაუდგინდა ტრავმა და ზურგის არეში გრძნობს ძლიერ ტკივილებს.
როგორც სააკაშვილი აღნიშნავს, ის საჭიროებს პოლიტიკისგან სრულად დაცლილ მკურნალობას, რისი მიღებაც საქართველოში, ამ ეტაპზე, შეუძლებელია.
"ვინაიდან ძალიან ბევრი სპეკულირებს ჩემი ჯანმრთელობის ირგვლივ, გადავწყვიტე პირადად ღიად ვისაუბრო ამაზე, თუ რას ვგრძნობ. MRT-ით ხერხემალზე დამიდგინეს ტრავმა, რომელიც დიდი ალბათობით მივიღე გლდანში, ძალის გამოყენებით გადაყვანისას, ეს ტრავმა, როგორც მივხვდი, საჭიროებს ქირურგიულ ჩარევას. დღესდღეისობით მაქვს ზურგის არეში ძლიერი ტკივილები და დღეში ზოგჯერ რამდენჯერმე ტკივილგამაყუჩებელ ნემსს მიკეთებენ. მაქვს ძლიერი ტრემორი და თავბრუსხვევა, ორივე ხელში და სულ უფრო ძნელად, რთულად ვიმორჩილებ კიდურებს, განსაკუთრებით მარცხენა ხელს, მაქვს მუდმივი ძლიერი ტკივილი ქვედა კიდურებში.
ნეიროქირურგმა, რომელმაც გამსინჯა გამოთქვა ვარაუდი, რომ კუნთები შეიძლება მალე ჩაიკეტოს და შემდეგ იმის აღდგენა შეუძლებელი იქნება, მე არ ვიცი ეს რას ნიშნავს ზუსტად, მაგრამ ის რაც ვიცი ნამდვილად ასეა, რომ სულ უფრო მიჭირს გადადგილება და ძირითადად წოლის რეჟიმში ვიმყოფები. MRT-ით ასევე თავის ტვინშიც დადგინდა გარკვეული ცვლილებები, რის შესახებაც მე ზუსტი ინფორმაცია არ მაქვს. ამ ყველაფერს ემატება რამდენიმე ათეული დღის განმავლობაში საკვების სრული მიუღებლობა.
საქმე იმაშია, რომ მხოლოდ მოწოდებებით, რომ არ ვიწვე და ვიკვებო, საქმე არ სწორდება, თორემ ვინც მიცნობთ ყველამ კარგად იცით, რომ ჰორიზონტალურ მდგომარეობა არ მახასიათებს და არც უმადობას ვუჩიოდი ოდესმე.
ჩემი ჯანმრთელობის საკითხზე ამდენი პოლიტიკური განცხადების ფონზე, სამწუხაროდ, აქ ჩემი რეალური განკურნება შეუძლებელი ხდება. საჭიროა პოლიტიკისგან სრულად დაცლილი მკურნალობა, რისი მიღებაც საქართველოში ამ ეტაპზე შეუძლებელია", - აღნიშნულია სააკაშვილის მიმართვაში.
დღეს, კლინიკა ვივამედმა მესამე პრეზიდენტის ჯანმრთელობის მდგომარეობასთან დაკავშირებით განცხადება გაავრცელა, სადაც აღნიშნულია, რომ მიხეილ სააკაშვილის ჯანმრთელობის მდგომარეობა სტაციონარში ყოფნის პერიოდში არ გაუარესებულა.
ამასთან, კლინიკის ცნობით, მაგნიტურ-რეზონანსული ტომოგრაფიაზე ნანახი ცვლილებები - ხანდაზმულია, არ არის კავშირში პაციენტის ამჟამინდელ მდგომარეობასთან და არ საჭიროებს აქტიურ სამედიცინო ჩარევას.
დახურვა