უკრაინულმა წყაროებმა გაავრცელეს ინფორმაცია, რომ 7 ივნისის გამთენიისას რუსეთის მიერ ოკუპირებულ ყირიმში მდებარე ნავთობბაზაზე დრონებით იერიში განხორციელდა.
Telegram-არხ „Crimean Wind“-ის ცნობით, ხანძარი გაჩნდა აღმოსავლეთ ყირიმში, ლენინოს დასახლებაში მდებარე სემიკოლოდიანსკის ნავთობბაზაზე, რომელიც საწვავის საცავად და რეგიონულ ლოჯისტიკურ ჰაბად გამოიყენება. კიდევ ერთმა პრო-უკრაინულმა არხმა, Exilenova+-მა, განაცხადა, რომ NASA-ს სატელიტურმა მონაცემებმა ობიექტზე ხანძარი დააფიქსირა.
ინფორმაცია დამოუკიდებელი წყაროებით დადასტურებული არ არის. რუსეთის საოკუპაციო ხელისუფლებას მომხდართან დაკავშირებით კომენტარი არ გაუკეთებია.
რუსეთის თავდაცვის სამინისტრომ განაცხადა, რომ ღამით საჰაერო თავდაცვამ რუსეთის ტერიტორიასა და ოკუპირებულ ყირიმზე 95 უკრაინული დრონი ჩამოაგდო, თუმცა ინფრასტრუქტურის დაზიანების შესახებ ინფორმაცია არ გაუვრცელებია.
დახურვა