რუმინეთში ქართველი მეზღვაური გემიდან გადავარდა და დინებამ გაიტაცა. ინფორმაციას საზღვაო ტრანსპორტის სააგენტოში ადასტურებენ და აცხადებენ, რომ მეზღვაური კონსტანტას ნავსადგურის აკვატორიაში, სანაპიროდან 60 საზღვაო მილის მოშორებით, ღუზაზე მდგომი გემიდან გადავარდა.
ცნობილია, რომ შემთხვევა გუშინ, 13 დეკემბერს მოხდა. სამძებრო-სამაშველო ოპერაცია ამ დრომდე მიმდინარეობს.
"როგორც ჩვენთვის ცნობილია, ეკიპაჟი მაშინვე შეეცადა მას საკუთარი ძალებით დახმარებოდა, გადაუგდეს სამაშველო რგოლი, თუმცა მეზღვაური დინებამ გაიტაცა და ვერ შეძლეს გემზე ამოყვანა.
რუმინეთში საქართველოს კონსულისა და რუმინეთის ზღვაზე ძებნა-გადარჩენის სამსახურისგან მიღებული ინფორმაციით, გემის კაპიტანმა მომხდარის შესახებ მაშინვე შეატყობინა შესაბამის სამსახურებს, ახლომდებარე გემებს და დაუყოვნებლივ დაიწყო სამაშველო ოპერაცია, რომელიც 13 დეკემბერს მთელი დღის განმავლობაში გაგრძელდა. მეზღვაურის ძებნის ოპერაცია ასევე დღეს, 14 დეკემბერს განახლდა და ამ დრომდე მიმდინარეობს", - აღნიშნულია საზღვაო ტრანსპორტის სააგენტოს ინფორმაციაში.
დახურვა