ბლინკენი: ნავალნის დაღუპვა ციხეში პუტინის აშენებული სისტემის სისუსტეს და ლპობას უსვამს ხაზს

ამერიკის შეერთებული შტატების სახელმწიფო მდივანი ენტონი ბლინკენი ამბობს, რომ ალექსეი ნავალნის გარდაცვალება რუსეთის ციხეში, "ერთი კაცის კომპლექსი და შიში მხოლოდ ხაზს უსვამს პუტინის აშენებული სისტემის სისუსტესა და ლპობას".

"უპირველეს ყოვლისა, თუ ეს ინფორმაცია სიმართლეს შეესაბამება, ვუსამძიმრებთ მის მეუღლესა და ოჯახს. მისი დაღუპვა რუსეთის ციხეში, ასევე ერთი კაცის აკვიატება და შიში მხოლოდ ხაზს უსვამს პუტინის აშენებული სისტემის სისუსტესა და ლპობას. რუსეთს ეკისრება ამაზე პასუხისმგებლობა. ჩვენ განვიხილავთ ამას ბევრ სხვა ქვეყანასთან, რომლებიც შეშფოთებულები არიან ალექსეი ნავალნის ბედით", - განაცხადა ენტონი ბლინკენმა. 

ცოტა ხნის წინ, ალექსეი ნავალნის ცოლმა მიუნხენის საერთაშორისო კონფერენციაზე სიტყვით გამოსვლისას თქვა, რომ ინფორმაცია ალექსეი ნავალნის დაღუპვასთან დაკავშირებით ჯერჯერობით მხოლოდ რუსული ოფიციალური წყაროებიდანაა ცნობილი, რისი ნდობაც, მისი თქმით, ძალიან რთულია.

***

რუსეთის სასჯელაღსრულების რეგიონული სამმართველო იუწყება, რომ რუსი ოპოზიციონერი პოლიტიკოსი ალექსეი ნავალნი გამოსასწორებელ კოლონიაში დაიღუპა. 

ნავალნი 47 წლის იყო.

უწყებაში ამტკიცებენ, რომ ყველა საჭირო რეანიმაციული ღონისძიება ჩატარდა, თუმცა მისი გადარჩენა ვერ შეძლეს: "გარდაცვალების მიზეზი დგინდება".

კრემლის პროპაგანდისტული RT ირწმუნება, რომ ნავალნის გარდაცვალების მიზეზი შესაძლოა თრომბია.

დეკემბერში ალექსეი ნავალნი განსაკუთრებული რეჟიმის კოლონიაში გადაიყვანეს, რომ პოლარული წრის მიღმა მდებარეობს.

ალექსეი ნავალნი 2021 წელს დააკავეს, როდესაც გერმანიიდან რუსეთში დაბრუნდა, სადაც მოწამვლის შემდეგ მკურნალობას გადიოდა. მაშინ ივ როშეს საქმეზე პოლიტიკოსს პირობითი მსჯავრი რეალურით შეუცვალეს.

2022 წელს სასამართლომ ნავალნის 9 წლით თავისუფლების აღკვეთა მიუსაჯა და ის თაღლითობაში დაადანაშაულა. 2023 წლის აგვისტოს ე.წ. ექსტრემიზმის საქმეზე ნავალნის 19 წელი მიუსაჯეს. თავდაპირველად ნავალნი ვლადიმირის ოლქის ციხეში იმყოფებოდა. გასული წლის დეკემბერში კი მისი ეტაპირება მკაცრი რეჟიმის კოლონიაში მოხდა.

ეატპირების პერიოდში ალექსეი ნავალნის თანამოაზრეები და ადვოკატები 20 დღის განმავლობაში ვერ უკავშირდებოდნენ, 25 დეკემბერს კი ცნობილი გახდა, რომ ახალ ციხეში გადაიყვანეს.

3 კოლონიაში, რომელსაც "პოლარულ მგელსაც" უწოდებენ და სადაც ახლა ნავალნი იყო მოთავსებული, იმყოფებოდნენ YUKOS-ის ერთ-ერთი თანამფლობელი პლატონ ლებედევი, ასევე უკრაინელი რეჟისორი და აქტივისტი ოლეგ სენცოვი.

აღნიშნულ ციხეში პირობები საკმაოდ მკაცრია, მისვლაც საკმაოდ რთულია და წერილების მიწოდებაც გართულებულია.