პრეზიდენტმა სალომე ზურაბიშვილმა მიხეილ სააკაშვილის პატიმრობასთან დაკავშირებით კიდევ ერთხელ ისაუბრა. ჟურნალისტის შეკითხვაზე, შეიწყალებს თუ არა ყოფილ პრეზიდენტს, ზურაბიშვილმა უპასუხა, რომ ამაზე "ერთხელ სამუდამოდ" პასუხი გაცემულია.
ის ფიქრობს, რომ მიხეილ სააკაშვილის აქტუალიზაცია ქართულ ოცნებას სჭირდება.
ზურაბიშვილის თქმით, მმართველი პარტიის ბოლო იმედი ამომრჩევლის მიხეილ სააკაშვილით "შეშინებაა".
"ერთხელ და სამუდამოდ პასუხი გაცემულია. მხოლოდ იმას აღვნიშნავ, რომ სააკაშვილის აქტუალიზაცია მხოლოდ და მხოლოდ ოცნებას სჭირდება. ნიშანდობლივია, რომ ყველა მისი სასამართლო ინიშნება ახლა და ყველა სასამართლოზე აძლევენ პირდაპირ ტრანსლაციას. ასეთი რამე მე არსად მინახავს. პირდაპირ ტრანსლაციას აძლევენ შეუზღუდავად, რომ პოლიტიკური გზავნილები გააკეთოს იქიდან იმიტომ, რომ ოცნების ბოლო იმედი არის ის, რომ ამომრჩეველი შეაშინოს სააკაშვილით. დღეს აქტუალური არ არის სააკაშვილი, დღეს აქტუალურია, რა მომავალი ექნება საქართველოს, ჯერ საქართველო უნდა გადავარჩინოთ და მერე სააკაშვილის ბედიც იქნება თავის ადგილას"- თქვა ზურაბიშვილმა.
დახურვა