ჩრდილოეთ ინდოეთის უტარ-პრადეშის შტატში ძლიერი წვიმისა და წყალდიდობის შედეგად, ბოლო სამი დღის განმავლობაში, სულ მცირე 62 ადამიანი დაიღუპა.
შტატის ხელისუფლების ინფორმაციით, სტიქიის შედეგად 46 ადამიანი დაშავდა, 1 000-ზე მეტი სახლი კი დაზიანდა. რამდენიმე რაიონში წყალდიდობის გამო სკოლები დაიხურა, მათ შორის შტატის დედაქალაქ ლაქნაუში.
სამაშველო ჯგუფები დატბორილი ტერიტორიებიდან მოსახლეობის უსაფრთხო ადგილებში გადაყვანას აგრძელებენ. მოქალაქეებს მოუწოდებენ, თავი აარიდონ დატბორილ გზებსა და სწრაფად მოძრავ მდინარეებთან, ნაკადულებთან და სანიაღვრეებთან მიახლოებას.
მეტეოროლოგების განცხადებით, ორშაბათიდან ნალექის ინტენსივობა უნდა შემცირდეს, თუმცა შტატის აღმოსავლეთ და დასავლეთ ნაწილებში მსუბუქი წვიმა სამშაბათამდეც არის მოსალოდნელი.
წყალდიდობამ ასევე დააზარალა ინდოეთის აღმოსავლეთით მდებარე ოდიშის შტატი, სადაც 75 000-ზე მეტი ადამიანი უსაფრთხო ადგილებში გადაიყვანეს.
მეზობელ ნეპალში კი, სტიქიასთან დაკავშირებულ შემთხვევებს 21 ადამიანი ემსხვერპლა. ხუთი ადამიანი დაკარგულად ითვლება, ხუთი კი დაშავდა. წყალდიდობამ და მეწყერმა 194 სახლი დააზიანა.
დახურვა