ქართველი UFC-ის მებრძოლი მერაბ დვალიშვილი აბუ-დაბიში მომხდარი ინციდენტის შესახებ განცხადებას ავრცელებს. სპორტსმენის თქმით, სასტუმროს ფოიეში მას და მის მეგობარს უსმან ნურმაგომედოვი და მისი თანმხლები პირები მოულოდნელად დაესხნენ თავს.
დვალიშვილმა მომხდარის შესახებ სოციალურ ქსელ Instagram-ში გამოქვეყნებულ ვიდეომიმართვაში ისაუბრა. მისი განმარტებით, ინციდენტის დროს სასტუმროს ფოიეში იმყოფებოდა და RAF-ისთვის ინტერვიუს იწერდა, როდესაც დაპირისპირება დაიწყო.
„სასტუმროს ფოიეში RAF-ისთვის ინტერვიუს ვაძლევდი, როცა უსმან ნურმაგომედოვი და მისი მეგობრები უკნიდან მოგვეპარნენ მე და ჩემს ახალგაზრდა მეგობარს და თავს დაგვესხნენ“, — განაცხადა ქართველმა მებრძოლმა.
დვალიშვილის მტკიცებით, სიტუაციაში სასტუმროს დაცვის თანამშრომლებიც ჩაერივნენ. მისი თქმით, დაცვის წევრები მას აკავებდნენ, ხოლო მეორე მხარის წარმომადგენლები ძირს დაცემულებს ფეხებით ურტყამდნენ.
ქართველმა სპორტსმენმა მომხდარს მშიშარა საქციელი უწოდა და უსმან ნურმაგომედოვს პირდაპირ მიმართა. დვალიშვილის განცხადებით, თუ მის ოპონენტს მასთან საუბარი ან დაპირისპირება სურდა, ამის გაკეთება ღიად და სამართლიან პირობებში შეეძლო.
„მხოლოდ ჩვენ ორნი — მე და ჩემი მეგობარი — ვიყავით აბუ-დაბიში. უსმან ნურმაგომედოვი და მისი მეგობრები კი უკნიდან, როგორც გველები, მოგვეპარნენ. ეს რა ჩხუბია? როგორი კაცი იქცევა ასე? თუ საუბარი ან ჩხუბი გინდა, მოდი და რეალურად გავაკეთოთ ეს. ჩვენ მხოლოდ ორნი ვიყავით, თქვენ კი მომზადებულები დაგვხვდით. რა ჯანდაბაა?“ — მიმართა დვალიშვილმა ნურმაგომედოვს.
მომხდარმა MMA-ს გულშემატკივრებში დიდი ინტერესი გამოიწვია. ამ დროისთვის ინციდენტის შესახებ ინფორმაცია ძირითადად მერაბ დვალიშვილის მონათხრობს ეფუძნება. უსმან ნურმაგომედოვს და მის თანმხლებ პირებს მომხდართან დაკავშირებით ოფიციალური კომენტარი ჯერ არ გაუკეთებიათ.
დახურვა