ქვეყანა პოლიციური კონტროლის ახალ ზომებზე გადადის - კოვიდ 19-ის შესაჩერებლად, პროცესში სამართალდამცველები ერთვებიან. ამის საჭიროება მას შემდეგ დადგა, რაც თვითიზოლაციაში მყოფი მოქალაქეების ნაწილმა დაუმორჩილებლობა გამოაცხადა.
დაავადებათა კონტროლის ცენტრის ხელმძღვანელი ამირან გამყრელიძე განმარტავს, რომ ქვეყნის მასშტაბით თვითიზოლაციის რეკომენდაცია 1100-ზე მეტ პირზე გაიცა, თუმცა არის შემთხვევები როდესაც მოქალაქეები საკარანტინო ზონას ტოვებენ და ექიმების რეკომენდაციას არ ითვალისწინებენ.
იმის გამო, რომ დაავადება სწრაფად ვრცელდება, დაავადებათა კონტროლის ეროვნული ცენტრის გადაწყვეტილებით, ვირუსზე სკრინინგ კვლევები თბილისის მსგავსად ქუთაისსა და ბათუმშიც ჩატარდება - ცენტრის რეგიონულ სამართველოებს კი, მეთვალყურეობას ლუგარის ლაბორატორია გაუწევს.
რაც შეეხება საზღვარგარეთ მყოფ საქართველოს მოქალაქეებს, თბილისის აეროპორტში დღეს კიდევ 2 სპეცრეისი დაეშვა იტალიიდან, რომელიც წითელ ზონად არის გამოცხადებული. ამ რეისების გამო, თბილისის საერთაშორისო აეროპორტში უსაფრთხოების ნორმები განსაკუთრებით გამკაცრებულია. ქვეყანაში დაბრუნებული 200 მოქალაქე თვითმფრინავის ეკიპაჟის წევრებთან ერთად, ორ კვირიან კარანტინს გაივლის.
კორონავირუსის გავრცელების მასშტაბებიდან გამომდინარე თბილისის, ქუთაისისა და ბათუმის აეროპორტებში დამონტაჟდა თერმოკამერები, რომლის მეშვეობითაც მგზავრის ტემპერატურის შემოწმება უკონტაქტოდ იქნება შესაძლებელი.
ამ დროისთვის ქვეყნის მასშტაბით კარანტინის რეჟიმში 178 ადამიანია მოთავსებული. ინფექციურ საავადმყოფოში კი 14 პაციენტის მკურნალობა გრძელდება, ერთის ჯანმრთელობის მდგომარეობა მძიმეა. ექიმების ინფორმაციით, საჩხერის საავადმყოფოში მყოფი კიდევ ერთი დაინფიცირებული პაციენტის ჯანმრთელობის მდგომარეობა სტაბილურია.
კორონავირუსის გავრცელების საფრთხის ზრდის მიუხედავად, ქართული მართლმადიდებელი ეკლესია ზიარების წესის შეწყვეტას არ გეგმავს, ერთადერთი გადაწყვეტილება ტაძრების დეზინფექციაა, რის გაკეთებაც ეკლესიამ საკუთარ თავზე არ აიღო და სახელმწიფოს მიმართა. მართლმადიდებელ ტაძრებში სამუშაოებს დაავადებათა კონტროლის ცენტრის მოძიებული კომპანია ჩაატარებს.
დახურვა