იუსტიციის მინისტრი და ვიცე-პრემიერი თეა წულუკიანი პარლამენტის თავმჯდომარედ მის შესაძლო დანიშვნას უარყოფს.
გარდა ამისა, მინისტრმა ის ინფორმაციაც უარყო, რომლის თანახმადაც, მან შესაძლოა მოღვაწეობა საკონსტიტუციო სასამართლოში გააგრძელოს. ის აგრეთვე, პრემიერ-მინისტრის გიორგი გახარიას სავარაუდო გადადგომასაც გამოეხმაურა და მას "ფეიკ ნიუსი" უწოდა.
როგორც წულუკიანმა განმარტა, საკადრო ცვლილებები მინისტრთა კაბინეტში არ იგეგმება.
"ბოლო დღეებში ვისმენდით ყალბ ინფორმაციას, რომ თითქოს თეა წულუკიანი მიდის საკონსტიტუციო სასამართლოში. ეს არის "ფეიკ ნიუსი". შემდეგ ვრცელდებოდა ყალბი ინფორმაცია, თითქოს წულუკიანი მიდის პარლამენტის თავმჯდომარედ და ესეც "ფეიკ ნიუსია". გუშინ ასევე ვნახეთ ოპოზიციური მედიის ეთერში, თითქოს პრემიერ-მინისტრი გიორგი გახარია მიდის თანამდებობიდან და ესეც "ფეიკ ნიუსია". არავინ არსად არ მიდის. ბატონი გახარია არის პრემიერი, რომელიც ჩვენს გუნდს მიიყვანს საბოლოო გამარჯვებამდე არჩევნებზე. ყველანი ვრჩებით იქ სადაც ამჟამად ვართ. ეს იქნება გუნდი, რომელიც არა მხოლოდ პანდემიას დაამარცხებს, არამედ უფრო მეტ ევროინტეგრაციას შემოიტანს ქვეყანაში, როგორც ეს ვიზალიბერალიზაციის დროს მოხდა. ეს იქნება გუნდი, რომელიც დემოკრატიული არჩევნებით დაამარცხებს ფეიკ ნიუსების შემქმნელ ოპოზიციას", - განაცხადა თეა წულუკიანმა.
დახურვა