მელია: მთავარია, მთელმა ქვეყანამ შევიხსნათ სამაჯური და გავთავისუფლდეთ

ნაციონალური მოძრაობის ერთ-ერთმა ლიდერმა ნიკა მელიამ გადაცემაში "პოლიტიკის ფორმულა" განაცხადა, რომ ის ელექტრონული სამაჯურის კეთებას აღარ აპირებს.

მელიას თქმით, ხელისუფლება ხალხთან არის დაპირისპირებაში შესული და შეუძლებელია, რომ გაიმარჯვოს.

"არ ვაპირებ ბატონი ოლიგარქის ბიჟუტერია კვლავ ვატარო. ახლა მთავარია მთელმა ქვეყანამ შევიხსნათ სამაჯური და გავთავისუფლდეთ. მგონი, დამოუკიდებელი საქართველოს ისტორიაში მსგავსი რამ არ მომხდარა. აბსოლუტურად განსხვავებული პარტიები ერთ პოზიციაზე ვართ. ეს დამთავრდება იმით, რომ ხელისუფლება დათმობს. ხელისუფლება ქვეყანაში ან ახალ თავისუფალ არჩევნებს ჩაატარებს, ან ხელისუფლებას აღარ ექნება მართვის სადავეები", - აცხადებს მელია.

ნიკა მელიამ 1 ნოემბერს საპროტესტო აქციაზე ელექტრონული სამაჯური მოიხსნა.  ენმ-ის გლდანის მაჟორიტარობის დეპუტატი ამბობს, რომ არ აპირებს მის ტარებას, ვინაიდან ეს უსამართლობის სიმბოლოა. 

ნაციონალური მოძრაობის ლიდერს, ნიკა მელიას ელექტრონული სამაჯური სააპელაციო სასამართლოს გადაწყვეტილებით დაუმაგრეს. მელიას დაპატიმრებას საქართველოს პროკურატურა 20 ივნისის აქციის საქმეზე ითხოვდა. ბრალდების მხარე მას ძალადობრივი ჯგუფის ხელმძღვანელობას ედავება. 

20 ივნისის საქმეზე ნიკა მელიასთვის აღკვეთის ღონისძიების შეფასების შემდეგ საქალაქო სასამართლომ მას 7 წლის წინ აღძრულ "ქართული ბანკის გაკოტრების საქმეზე" გამოუტანა განაჩენი. ამ საქმეს პროკურატურა წლების განმავლობაში იძიებდა. სასამართლომ მას 25 000 ლარიანი ჯარიმა დააკისრა და 3 წლით თანამდებობის დაკავების უფლება აუკრძალა. ეს გახდა იმის საფუძველი, რომ ქართულმა ოცნებამ მას დეპუტატის მანდატი შეუწყვიტა.

ცესკომ უბნების დათვლა დაასრულა. დათვლილია ქვეყნის მასშტაბით 3847 უბანი.

წინასწარი შედეგები ასეთია:

ქართული ოცნება N41 - 48,15% (926 959 ხმა)

ნაციონალური მოძრაობა - ძალა ერთობაშია N5 - 27,14% (522 563 ხმა)

ევროპული საქართველო N2 - 3,78% (72 752 ხმა) 

გირჩი N36 - 2,89% (55 600 ხმა)

ლელო N56 - 3,15% (60 691 ხმა)

გიორგი ვაშაძე - სტრატეგია აღმაშენებელი N27 - 3,15% (60 592 ხმა)

პატრიოტთა ალიანსი N8 - 3,14%  (60 493 ხმა)

ალეკო ელისაშვილი - მოქალაქეები N24  - 1,33% (25 534 ხმა)

ლეიბორისტული პარტია N10 - 1% (19 281 ხმა)

ორგანიზაცია სამართლიანი არჩევნები, რომელმაც საარჩევნო ხმები პარალელურად დაითვალა, აცხადებს, რომ მათ მიერ მიღებულ შედეგებში სხვაობა 3-4%-ია. ორგანიზაციამ გამოავლინა მნიშვნელოვანი დარღვევები, მათ შორის, დისბალანსი ოქმებს შორის. ISFED აცხადებს, რომ ეს დარღვევა უბნების 8%-ში გამოვლინდა, რისი შედეგებზე შესაძლო მაქსიმალური გავლენა იქნებოდა მაქსიმუმ 4.1%. ორგანიზაცია აცხადებს, რომ აუცილებელია მოხდეს იმ უბნების შედეგების გადათვლა, სადაც ოქმებში დისბალანსი იყო. 

პარლამენტში შესვლაზე ყველა ოპოზიციურმა პარტიამ თქვა უარი.