იუსტიციის მინისტრის გოჩა ლორთქიფანიძის ინფორმაციით, ევროსაბჭოს მინისტრთა კომიტეტთან მუშაობის შედეგად რუსეთი დათანხმა დეპორტირებულებისთვის კომპენსაციის გადახდას და ამ საკითხზე განხილვებში ჩაერთო. მინისტრის შეფასებით, ეს მცირეოდენი, მაგრამ მნიშვნელოვანი წინსვლაა.
"დეპორტირებულების საკითხზე გვაქვს მცირეოდენი წინსვლა. რუსეთი უარს არ აცხადებს კომპენსაციის გადახდაზე და მინისტრთა კომიტეტის განხილვებზე ის უკვე ჩაერთო ამ კომპენსაციის გადახდის საკითხის განხილვაში, რაც მცირეოდენი, მაგრამ მნიშვნელოვანი ცვლილებაა დინამიკაში.
ეს მიუთითებს იმაზე, რომ ამ მცდელობას, ამ ძალისხმევას ყოველთვის აქვს აზრი, რაც დაადასტურა 21 იანვრის სტრასბურგის სასამართლოს გადაწყვეტილებამ. კონკრეტული აღსრულების საკითხზე რუსეთს უხდება ურთიერთობა ევროპის საბჭოს ყველა წევრ სახელმწიფოსთან და მათ შორის, ჩვენთან", - აცხადებს იუსტიციის მინისტრი.
სტრასბურგის სასამართლომ ე.წ. დეპორტირებულების საქმეზე გადაწყვეტილება 2019 წლის იანვარში გამოაცხადა. საქმეზე "საქართველო რუსეთის წინააღმდეგ" ადამიანის უფლებათა ევროპული სასამართლოს დიდმა პალატამ დაადგინა, რომ რუსეთმა საქართველოს სასარგებლოდ 10 მილიონი ევროს ოდენობის მორალური კომპენსაცია უნდა გადაიხადოს.
ამ საქმეზე იუსტიციის სამინისტრომ ევროსასამართლოში 1 795 ადამიანის სია წარადგინა. საქართველოს მთავრობამ საჩივარი სტრასბურგის სასამართლოში 2007 წლის 26 მარტს შეიტანა.
დახურვა