თვითმხილველის ინფორმაციით, ავლაბრის მეტროსთან მდებარე საქართველოს ბანკში თავდამსხმელმა ბანკის თანამშრომლები და დაცვა აიყვანა მძევლად, ერთი ასაკოვანი ქალი კი გაუშვა. რუსთავი 2-თან საუბრისას იგი ყვება, რომ აღელვებული ქალი ბანკის შენობიდან გამოვიდა და შიგნით არსებულ სიტუაციაზე მოუყვა:
"ინფორმაცია მიმიღია ასეთი, რომ შიგნით შევიდა ბანდიტი, ალბათ. შიგნით 3 თანამშრომელი და 1 დაცვა ყავს აყვანილი. აქ ვიდექი, აქ ვდგავარ ხოლმე ბირჟაზე. ქალი გამოვიდა, მოხუცი ქალი, უთქვამს გამიშვი შვილოო, გაკვეთილები მაქვს ბავშვებისო. მე არ გამოვჩნდები, მიაწექით კარებს და გადითო. გამოვიდა ქალი და [თქვა] შუბლზე მოამდო იარაღიო", - ყვება თვითმხილველი რუსთავი 2-თან საუბარში.
ავლაბრის მეტროსთან მდებარე საქართველოს ბანკში შეიარაღებული პირი ცოტა ხნის წინ შეიჭრა. ადგილზე არიან პოლიციელები და სპეცრაზმელები.
არსებული ინფორმაციით, შეიარაღებულმა პირმა რამდენიმე ადამიანი მძევლად აიყვანა. ერთ-ერთი სამართალდამცველის თქმით, ავლაბრის მეტრო დაკეტილია და ტერიტორიიდან ხალხი გაყავთ.
ფორმულა ინფორმაციის დაზუსტებას შინაგან საქმეთა სამინისტროსთან ცდილობს.
დახურვა