ნიუ ჰოსპიტალსის ხელმძღვანელის გიორგი რამიშვილის განცხადებით, კრწანისის ქუჩაზე მომხდარი ავტოსაგზაო შემთხვევის შედეგად კიდევ ერთი დაშავებული გარდაიცვალა.
როგორც რამიშვილმა აღნიშნა, კლინიკაში სულ 5 პაციენტი გადაიყვანეს.
"დაახლოებით 2 საათის წინ კლინიკაში ერთდროულად პოლიტრავმებით შემოიყვანეს 5 ადამიანი. აქედან ერთი ადამიანი უმძიმესი პოლიტრავმით, გულის გაჩერებით. ჩატარებული რეანიმაციული ღონისძიებების მიუხედავად, სიცოცხლესთან შეუთავსებელი დაზიანებებით გარდაიცვალა", - განაცხადა კლინიკის ხელმძღვანელმა.
მისივე თქმით, კლინიკაში მკურნალობას 4 ადამიანი აგრძელებს, მათ შორის ერთ-ერთი არასრულწლოვანია. რამიშვილი ამბობს, რომ ბავშვს მოტეხილობები აღენიშნება.
"ზოგიერთის მდგომარეობა მძიმეა, ზოგიერთის საშუალო სიმძიმის", - აღნიშნა რამიშვილმა.
შეგახსენებთ, რომ კრწანისში, ნიუ ჰოსპიტალის ეზოში სატვირთო მანქანა შევარდა და რამდენიმე ავტომობილი მოიყოლა. შსს-ს ინფორმაციით, ადგილზე გარდაიცვალა 1 ადამიანი - სატვირთო მანქანის მძღოლი, დაშავდა - 8. მომხდარზე დაწყებულია გამოძიება.
დახურვა