logo
ENG



ევროპის წამლის სააგენტომ კორონავირუსის სამკურნალო წამალ პაქსლოვიდს რეკომენდაცია გაუწია

28 იან 202211:19
3 წუთის საკითხავი
clock 969
2022/01/28/f7vxsh2yuhais9r.jpg

ევროპის წამლის სააგენტოს ადამიანებისთვის განკუთვნილი მედიკამენტების კომიტეტმა კომპანია ფაიზერის მიერ შექმნილ კორონავირუსის სამკურნალო წამალს, პაქსლოვიდს რეკომენდაცია გაუწია და ევროკავშირში მარკეტინგისთვის ავტორიზაცია მისცა.

კომიტეტმა პაქსლოვიდს ავტორიზაცია COVID-19-ის მკურნალობაზე იმ ზრდასრულებისთვის მისცა, ვინც არ საჭიროებს დამატებით ჟანგბადის მიწოდებას და ასევე მათ ვინც ვირუსის რისკ ჯგუფს წარმოადგენს და დიდი შანსია, რომ დაავადებას გართულებული ფორმით გადაიტანს.

პაქსლოვიდი პირველი ორალურად მისაღები წამალია, რომელმაც ევროკავშირში კორონავირუსის მკურნალობის რეკომენდაცია მიიღო.

გადაწყვეტილების მიღების პროცესში ევროპის წამლის კომიტეტმა შეაფასა კორონავირუსით ინფიცირებულ პაციენტებში ჩატარებული კვლევები, რომელთა მიხედვითაც პაქსლოვიდი მნიშვნელოვნად ამცირებს ჰოსპიტალიზაციასა და სიკვდილიანობას იმ პაციენტებში, ვისაც მინიმუმ 1 თანმდევი დაავადება აქვს და კორონავირუსის რისკ ჯგუფს წარმოადგენს.

პაქსოლივიდის მიღების შემდეგ პაციენტებში სიკვდილიანობა არ დაფიქსირებულა ჰოსპიტალიზაცია კი 1000-ზე მეტი პაციენტიდან მხოლოდ 0.8%-ს დასჭირდა. ამ პაციენტების უმრავლესობა კორონავირუსის დელტა ვარიანტით იყო ინფიცირებული, თუმცა ლაბორატორიული კვლევების მიხედვით, სავარაუდოა, რომ ეს მედიკამენტი ომიკრონისა და სხვა ვარიანტების მიმართაც აქტიური იქნება.

აღსანიშნავია, რომ პაქსლოვიდი კომიტეტმა უსაფრთხო მედიკამენტად მიიჩნია, რომელსაც სუსტი გვერდითი ეფექტები აქვს.

წამალი ორ აქტიურ ნივთიერებას, ნირმატრელვირსა და რიტონავირს შეიცავს. ნირმატრელვირი COVID-19-ის გამომწვევ ვირუსს სხეულში გავრცელებასა და გამრავლებაში უშლის ხელს. რიტონავირი კი ახანგრძლივებს ამ ეფექტს.

კომიტეტმა შეაჯამა, რომ პაქსლოვიდის სარგებელი ბევრად აღემატება მის რისკებს და მისი მიღებაზე რეკომენდაცია გასცა. ევროპის წამლის სააგენტო გადაწყვეტილებას ევროკომისიას გაუგზავნის, რათა წამლის გამოყენებაზე გადაწყვეტილება უმოკლეს ვადებში გავრცელდეს ევროკავშირის წევრ ქვეყნებზე.


close დახურვა