ომის კვლევის ამერიკული ინსტიტუტის (ISW) ცნობით, უკრაინის დიდი გამარჯვება, რომელიც ხერსონის რეგიონში გრძელდება, ბოლო არ იქნება.
"უკრაინა ინიციატივას იჩენს და ხერსონში დიდი გამარჯვების მოპოვების პროცესშია. ცეცხლის შეწყვეტა მისცემს კრემლს იმ პაუზას, რომელიც მას უიმედოდ სჭირდება რუსული ძალების აღსადგენად. უკრაინის დიდი გამარჯვება, რომელიც ხერსონის რეგიონში გრძელდება, ბოლო არ იქნება", - ნათქვამია განცხადებაში.
უკრაინის სამხედრო ოფიციალური პირები ადასტურებენ, რომ ბოლო 24 საათის განმავლობაში უკრაინულმა ძალებმა წარმატებას მიაღწიეს ქალაქ ხერსონის ჩრდილო-დასავლეთით, დასავლეთით და ჩრდილო-აღმოსავლეთით, ზოგიერთ რეგიონში კი 7 კმ-მდე დაწინაურდნენ.
"რუსები ჯერ კიდევ შედარებით ორგანიზებულად უკან იხევენ, ხოლო უკრაინული ჯარები მოსალოდნელ წარმატებას რუსული ძალების დამარცხების გარეშე აღწევენ, როგორც ეს იყო ხარკივის კონტრშეტევის დროს.
რუსული ჯარების გაყვანას გარკვეული დრო დასჭირდება და ხერსონის რეგიონში ბრძოლა გაგრძელდება, რადგან უკრაინული ჯარები წინ მიიწევენ და რუსეთის თავდაცვის ხაზებს აწყდებიან, განსაკუთრებით ქალაქ ხერსონის ირგვლივ", - განაცხადა ომის კვლევის ინსტიტუტმა.
9 ნოემბერს, რუსეთის თავდაცვის მინისტრმა, სერგეი შოიგუმ ხერსონიდან ჯარების გაყვანის ბრძანება გასცა. ამ გადაწყვეტილებას წინ უძღოდა უკრაინაში რუსული ჯარების გაერთიანებული დაჯგუფების მეთაურის, სერგეი სუროვიკინის წინადადება, რომ დაწყებულიყო ჯარების გაყვანა ხერსონიდან, რასაც შოიგუ დათანხმდა. სუროვიკინი თავის შეთავაზებას იმით ხსნის, რომ დნიპროს მარცხენა მხარეს თავდაცვის ხაზის ორგანიზება უნდა დაიწყონ.
დახურვა