The Wall Street Journal სირიელ ოფიციალურ პირებზე დაყრდნობით წერს, რომ ეგვიპტემ და იორდანიამ ბაშარ ალ-ასადს სირიის დატოვებისკენ მოუწოდეს.
გამოცემას სირიელმა ოფიციალურმა პირებმა დაუდასტურეს, რომ სირიის პრეზიდენტის მეუღლე და შვილები რუსეთში გაემგზავრნენ, ხოლო თავად ბაშარ ალ-ასადი სირიაში იმყოფება. ვაშინგტონში სირიის საელჩომ ეს ინფორმაცია უარყო.
ამასთან, გავრცელებული ინფორმაციით, ეგვიპტის ოფიციალურმა პირებმა ალ-ასადს დროებითი საბჭოს ფორმირება ურჩიეს, რომელშიც ოპოზიციის წარმომადგენლები შევლენ.
The New York Times წერს, რომ ასადის მოკავშირეები: ირანი, რუსეთი და ჰეზბოლა საკუთარი პრობლემების მოგვარებით არიან დაკავებულები. ირანი და ჰეზბოლა ისრაელთან წინააღმდეგობითაა დაკავებული, ხოლო რუსეთი - უკრაინის წინააღმდეგ ომით.
შეიარაღებულმა ჯგუფებმა სირიის სამთავრობო არმიის წინააღმდეგ შეტევა ნოემბრის ბოლოს დაიწყეს. რამდენიმე დღის განმავლობაში ისლამისტებმა მოახერხეს ქალაქების - ალეპოს, ჰამას და დაირ-ელ-ზავრის - თავიანთი კონტროლის ქვეშ მოქცევა. არსებობს ინფორმაცია, რომ ანტისამთავრობო ფორმირებებმა დაიკავეს დარაა, სადაც 2011 წელს დაიწყო აჯანყება ასადის წინააღმდეგ.
დახურვა