ფორმულას საინფორმაციო გამოშვებების ციფრული და სოციალური მედიის გუნდი გთავაზობთ 24 მაისის მნიშვნელოვან მოვლენებს.
როდის დასრულდება საზოგადოებრივი ტრანსპორტით გადაადგილების შეზღუდვა?
„არსებული შეზღუდვების მაქსიმალურ ვადად 15 ივლისის განსაზღვრა არ ნიშნავს, რომ ამ დროისთვის მოქმედი ყველა შეზღუდვა 15 ივლისამდე შენარჩუნდება“ - აცხადებენ მთავრობის ადმინისტრაციაში და განმარტავენ, რომ შეზღუდვები ქვეყანაში არსებული ეპიდემიოლოგიური სიტუაციიდან გამომდინარე, ნებისმიერ დროს შეიძლება მოიხსნას.
მთავრობა საზოგადოებრივი ტრანსპორტის აღდგენასთან დაკავშირებით სპეციალისტების რეკომენდაციებს ელოდება, რის შემდეგაც კონკრეტულ გადაწყვეტილებას მიიღებს. აღნიშნულის შემდეგ დადგენილებაში კონკრეტული ცვლილებები შევა - „შეზღუდვების ვადა 15 ივლისია, თუმცა გამორიცხული არაა ტრანსპორტის მოძრაობა უფრო ადრე აღდგეს“
დადგენილება, რომელიც საქართველოს მთავრობამ ქვეყანაში გარკვეული შეზღუდვების ძალაში დატოვების შესახებ გამოსცა, ძალაშია 2020 წლის 15 ივლისამდე.
უკრაინელი დეპუტატი, ვალერი დავიდენკო, საკუთარ ოფისში გარდაცვლილი იპოვეს
უკრაინული მედიის ინფორმაციით, მერვე და მეცხრე მოწვევის პარლამენტის დეპუტატს ცეცხლსასროლი იარაღით ჭრილობა თავში აქვს მიყენებული.
მათივე ცნობით, ოთახში ცეცხლსასროლი იარაღია ნაპოვნი. დეპუტატმა, სავარაუდოდ, თავი მოიკლა, თუმცა პოლიცია მკვლელობის ან თვითმკვლელობის ინსცენირების ვერსიებსაც განიხილავს. გამოძიება განზრახ მკვლელობის მუხლით მიმდინარეობს.
დავიდენკო უკრაინის უმაღლესი რადას წევრი 2014 წლიდან იყო.
მუსლიმური სამყარო დღეს რამადან ბაირამს ზეიმობს
მუსლიმური სამყარო რამადან ბაირამს ზეიმობს. დღესასწაული ქართველმა მუსლიმებმა ტრადიციულად აღნიშნეს. ორთვიანი პაუზის შემდეგ ჯგუფური ლოცვა აჭარაში მოქმედ ყველა მეჩეთში პირველად შესრულდა.
ბათუმის ცენტრალურ მეჩეთში სადღესასწაულო ლოცვა საქართველოს მუფთმა ადამ შანთაძემ აღავლინა. მორწმუნეები მეჩეთებში პირბადეებითა და ხელთათმანებით იყვნენ წარმოდგენილი.
რამადან ბაირამი მუსლიმურ სამყაროში ერთ-ერთი უდიდესი დღესასწაულია. მას ერთთვიანი მარხვის შემდეგ ზეიმობენ. მორწმუნეებს მზის ამოსვლიდან მზის ჩასვლამდე ეკრძალებათ საკვებისა და წყლის მიღება.
გუშინ თბილისში ძლიერი ქარის შედეგად 13 ავტომობილი დაზიანდა
ბოლო 12 საათის განმავლობაში, უამინდობის გამო, მთელი საქართველოს მასშტაბით, დაფიქსირდა 260 შეტყობინება, აქედან 240 - თბილისში. არც ერთ შემთხვევაში არ დაფიქსირებულა მოქალაქეების დაშავება ან დაზიანება - ინფორმაციას საგანგებო სიტუაცეების მართვის სამსახური ავრცელებს.
შეტყობინებების უმეტესობა ხის ან ტოტების მოტეხის შესახებ იყო, დაფიქსირდა რამდენიმე სარეკლამო ბილბორდის დაზიანებაც და შემთხვევები, რა დროსაც ძლიერმა ქარმა საცხოვრებელ სახლებს სახურავი გადახადა.
საქართველოში COVID-19-ისგან კიდევ 13 პაციენტი გამოჯანმრთელდა
730 ინფიცირებული, მათგან 522 გამოჯანმრთელებული და 12 გარდაცვლილი - ასეთია ქვეყანაში კორონავირუსის გავრცელების ბოლო მაჩვენებელი.
სტაციონალური მეთვალყურეობის ქვეშ 243 პაციენტი რჩება, კარანტინში კი 3511 პირი. შედარებით მძიმეა თბილისის ინფექციურ საავადმყოფოში კორონავირუსით ინფიცირებული ორი პაციენტის ჯანმრთელობის მდგომარეობა.
ბოლო 24 საათის განმავლობაში, მსოფლიოში კორონავირუსის 100 000-ზე მეტი ახალი შემთხვევა დაფიქსირდა
ბოლო მონაცემებით, მსოფლიოში კორონავირუსის დადასტურებულმა შემთხვევებმა 5.4 მილიონს გააჭარბა. მათგან უკვე გამოჯანმრთელებულია 2.2 მილიონზე მეტი პაციენტი. კოვიდინფექციით დაღუპულთა საერთო რაოდენობა 344 ათასს აღემატება. ამ დროისთვის, 53 000-ზე მეტი პაციენტის ჯანმრთელობის მდგომარეობა სერიოზული ან კრიტიკულია.
COVID-19-ის გავრცელების ყველაზე დიდი მაჩვენებლით კვლავ შეერთებულ შტატები ლიდერობს. ამ დროისთვის შტატებში ინფექციის დადასტურებული შემთხვევების რაოდენობა 1.6 მილიონზე მეტია. აღსანიშნავია, რომ აშშ-ში ვირუსი უკვე 446 ათასზე მეტმა მოქალაქემ დაამარცხა.
კორონავირუსის ვირუსის გავრცელების ახალ ეპიცენტრად ჯანმომ სამხრეთ ამერიკის კონტინენტი და კერძოდ ბრაზილია გამოაცხადა. მსოფლიოში ეს ქვეყანა ინფიცირებულთა რაოდენობით უკვე მეორე ადგილს იკავებს. აქ ვირუსი დადასტურებული აქვს 349 ათასზე მეტ ადამიანს, ხოლო გარდაცვლილთა რაოდენობა 23 ათასს აჭარბებს.
რთული ვითარებაა, აგრეთვე, რუსეთშიც სადაც ინფიცირებულია 335 000-ზე მეტი ადამიანი. ინფიცირებული ადამიანების რაოდენობა იმატებს ესპანეთსა და დიდ ბრიტანეთშიც.
გარდაცვალების შემთხვევები მცირდება იტალიაში. როიტერის ინფორმაციით, ბოლო ერთ დღეში იტალიაში კოვიდ19-ით 119 ადამიანი დაიღუპა.
დახურვა