სამოქალაქო აქტივისტი ლაშა ხუსკივაძე ამბობს, რომ თელავის თეატრის წინ არჩევნების გაყალბების პროტესტის ნიშნად გაშლილ საპროტესტო კარავს, უკვე მეორედ, მანქანა დაეჯახა.
პირველად კარავს ავტომობილი ახალ წელს, 1 იანვრის დილას დაეჯახა.
"რეჟიმმა ომი გამოგვიცხადა. თელავის კარავს ვიღაც ქოცი მანქანით დაეჯახა. საბედნიეროდ ჩვენი მეგობრები კარგად არიან", - დაწერა მაშინ ხუსკივაძემ.
მეორედ კი, მსგავსი შემთხვევა დღეს, 5 იანვარს განმეორდა. თავად ხუსკივაძე აცხადებს, რომ კარავი ავტომანქანის სავალი ნაწილიდან 30-40 მეტრის დაშორებით მდებარეობს. იგი შინაგან საქმეთა სამინისტროსგან შესაბამის რეაგირებას მოითხოვს.
თელავის თეატრის წინ სამოქალაქო აქტივისტებმა კარავი 6 დეკემბერს გაშალეს.
"არჩევნების გაყალბება ისჯება კანონით", "საქართველო ოკუპირებულია რუსი ოლიგარქის მიერ" - სწორედ ეს წარწერებია მიმაგრებული კარავზე, რომლის მთავარი მიზანიც 2020 წლის საპარლამენტო არჩევნების გაყალბების პროტესტია.
საპროტესტო კარვები ანალოგიური მოთხოვნებით გაშლილია ბათუმის მთავრობის სახლთან და თბილისში, პარლამენტის შენობასთან.
დახურვა