ერაყში, ქალაქ ერბილის საერთაშორისო აეროპორტს თავს დრონებით დაესხნენ - აეროპორტს აშშ-ის სამხედრო ძალები აკონტროლებენ. ამ დროისთვის დაღუპულების შესახებ ინფორმაცია არ ვრცელდება.
ქურთისტანის უსაფრთხოების ძალების წარმომადგენლების თქმით, აეროპორტთან სამი რაკეტა ჩამოვარდა. თუმცა, განსხვავებულია კონტრტერორისტული ძალების ინფორმაცია - მათი განცხადებით, თავდასხმა თვითაფეთქებადი დრონებით განხორციელდა. თვითმხილველები ამბობენ, რომ, სულ ცოტა, ექვსი აფეთქების ხმა გაიგონეს.
ქურთისტანის რეგიონის დედაქალაქი თავდასხმის ობიექტი რამდენჯერმე გახდა. აშშ-ის წარმომადგენლები წინა თავდასხმებს ირანთან კავშირში მყოფ შიიტურ პოლიციის დანაყოფს უკავშირებენ, რომელთაც პირობა დადეს, რომ იბრძოლებდნენ მანამ, სანამ 2500 ამერიკელი ჯარისკაცი არ დატოვებდა ქვეყანას.
აშშ-ის სამხედრო ძალები ქვეყანაში საერთაშორისო სამხედრო კოალიციის მანდატით მოქმედებენ, რათა დაეხმარონ ერაყის სამხედროებს სუნიტი ექსტრემისტი ძალების წინააღმდეგ ბრძოლაში. ისლამური სახელმწიფოს ექსტრემისტულ ძალებს მომხდარზე განცხადება არ გაუვრცელებიათ.