აჭარის ავტონომიური რესპუბლიკის უმაღლესი საბჭოს თავმჯდომარე, დავით გაბაიძე გადადგა - ამის შესახებ მან პრესკონფერენციაზე განაცხადა.
"მსურს, განვაცხადო აჭარის ავტონომიური რესპუბლიკის უმაღლესი საბჭოს თავმჯდომარის პოსტიდან ჩემი გადადგომის შესახებ. ბევრისთვის ეს ფაქტი უკვე ცნობილია პრაქტიკულად, თუმცა სამართლებრივი პროცედურაა, რომ ეს განცხადება უნდა გაკეთდეს. ვაფიქსირებ ჩემს ამ პოზიციას. გადადგომის განცხადებასთან ერთად მინდა, მადლობა ვუთხრა „ქართული ოცნების“ გუნდს. სამი მოწვევის განმავლობაში არასრული 10 წელი ვხელმძღვანელობდი ამ მნიშვნელოვან ინსტიტუციას, ვემსახურე ხალხს, როგორც შემეძლო. ძალები არ დამიზოგავს. მადლობა მინდა ვუთხრა განსაკუთრებით პარტიის დამფუძნებელს, ბიძინა ივანიშვილს, პრემიერ-მინისტრ ირაკლი კობახიძეს, პრეზიდენტს, საქართველოს პარლამენტის თავმჯდომარეს, მთავრობის წევრებს" - თქვა გაბაიძემ.
დავით გაბაიძე აჭარის მთავრობის ყოფილი თავმჯდომარის, თორნიკე რიჟვაძის, ნათესავია. ის აჭარის უმაღლეს საბჭოს თავმჯდომარის პოზიციას 2016 წლიდან იკავებდა.
გავრცელებული ინფორმაციით, აჭარის უმაღლესი საბჭოს თავმჯდომარის პოზიციაზე, აჭარის უმაღლესი საბჭოს წევრი "ქართული ოცნებიდან" ცოტნე ანანიძე მოიაზრება.
"აჭარის უმაღლესი საბჭოს თავმჯდომარეობასთან დაკავშირებით კონსულტაციები არ ყოფილა. ყველა ჩემი კოლეგა პროფესიონალია და უმაღლესი საბჭოს თავმჯდომარის პოზიციას თავს გაართმევს", - ამის შესახებ აჭარის უმაღლეს საბჭოში ქართული ოცნების წევრმა ცოტნე ანანიძემ ჟურნალისტებთან საუბრისას განაცხადა, როდესაც გამოეხმაურა გავრცელებული ინფორმაციას, რომ ცოტნე ანანიძე აჭარის უმაღლესი საბჭოს თავმჯდომარის პოზიციაზე მოიაზრება.
დახურვა