ბოჭორიშვილის სახელობის კლინიკის სამეთვალყურეო საბჭოს თავმჯდომარემ მაკა სოლოღაშვილმა ჟურნალისტებთან საუბრისას დაადასტურა, რომ კოვიდ 19 სასულიერო პირს დაუდასტურდა. მან ასევე განაცხადა, რომ დღის განმავლობაში კორონავირუსისგან განკურნებული ერთი პაციენტი გაეწერება საავადმყოფოდან.
„დამატებულია 5 პაციენტი. 21-პაციენტიდან 8 პაციენტია 18 წლამდე ასაკის. აქედან, 1 გაეწერება, მას გამოჯანმრთელება დაუდასტურდა. კვლევაში ჩაერთვება 10 ახალი პაციენტი. დანარჩენები აგრძელებენ მკურნალობას.
სასულიერო პირს დადასტურებული აქვს კოვიდ 19-ის დიაგნოზი. გუშინ შემოიყვანეს - სულ ოჯახის სამი წევრია მოთავსებული და ვის ვისგან გადაედო არ ვიცით“, - განაცხადა სოლოღაშვილმა.
შეგახსენებთ, რომ ქვეყანაში საყოველთაო კარანტინი და კომენდანტის საათია გამოცხადებული. მოქალაქეებს გარკვეული შეზღუდვები დაუწესდათ. მათ შორის, ქვეყნის მასშტაბით 21:00 საათიდან, დილის 06:00 საათამდე ტრანსპორტის და ქვეითად მოსიარულეთა გადაადგილება იკრძალება.
საქართველოში ვირუსით ინფიცირების პირველი შემთხვევა 26 თებერვალს დაფიქსირდა. ქვეყანაში უკვე დაფიქსირებულია შიდა გადაცემის ფაქტებიც. ამ დროის მონაცემებით, აღრიცხულია ინფიცირების 296 შემთხვევა - აქედან 68 გამოჯანმრთელებულია.
ჯანდაცვის მსოფლიო ორგანიზაციამ ვირუსი პანდემიად 11 მარტს გამოაცხადა.
დახურვა