ვივამედის ექიმი: ნევროლოგიური თვალსაზრისით სააკაშვილი მძიმე პაციენტია

ვივამედის ნევროლოგი, თამარ აბაშიძე ადასტურებს, რომ ნევროლოგიური თვალსაზრისით ყოფილი პრეზიდენტი მძიმე პაციენტია. ამის შესახებ მიხეილ სააკაშვილის მკურნალმა ექიმმა სასამართლოში გამოკითხვის დროს განაცხადა.

"ნევროლოგიური თვალსაზრისით მძიმე პაციენტია", - უპასუხა მან ადვოკატის მიერ დასმულ კითხვას.

მას ასევე ჰკითხეს, ჩატარებული მკურნალობის შედეგად დადგა თუ არა დადებითი შედეგი, რაზეც მკურნალმა ექიმმა თქვა:

"დადებით შედეგს ვერც გამოვიღებთ, თუ არ დავიწყებთ ფსიქო-ნეირო რეაბილიტაციას. მკურნალობა არ არის მხოლოდ მედიკამენტოზური, ამ შემთხვევაში, აუცილებლად მოიცავს მედიკამენტოზურ ნაწილსა და რეაბილიტაციურ ნაწილს. ეს რეაბილიტაციური ნაწილი სხვადასხვა ეტაპზე, სხვადასხვა მიზეზით, სუბიექტური თუ ობიექტურით, თქვენც ნახეთ რომ ყველა გასინჯვა, კონსულტაცია მთავრდება იმით, რომ დღის წესრიგში რჩება ნეირორეაბილიტაციის დაწყება", - აღნიშნა ექიმმა.

თბილისის საქალაქო სასამართლოში სასჯელის გადავადებაზე ან გაუქმებაზე მიხეილ სააკაშვილის პროცესი მიმდინარეობს.

სააკაშვილის ოჯახის წევრები და ადვოკატები მის უცხოეთში სამკურნალოდ გადაყვანას ითხოვენ - 12 დეკემბერს სტრასბურგში გამართულ პრესკონფერენციაზე კი, ევროპარლამენტარებმა მირიამ ლექსმანმა და ანა ფოტიგამ კიდევ ერთხელ მოუწოდეს ქართულ ოცნებას, გათავისუფლდეს სააკაშვილი ჯანმრთელობის მდგომარეობის გამო.

ამერიკაში ჩატარებულ ტოქსიკოლოგიურ ექსპერტიზაში, რომელსაც პროფესორი დეივიდ სმიტი აწერს ხელს, წერია, რომ მიხეილ სააკაშვილის ორგანიზმში აღმოჩენილია მძიმე მეტალებისა და სხვა აგენტების არსებობა, მათ შორისაა ვერცხლისწყალი და დარიშხანი. ამ ნივთიერებებს უკავშირებს სპეციალისტი სააკაშვილის პათოლოგიურ სიმპტომებს.

გარდა ამისა, 24 დეკემბერს შაბათის ფორმულამ მოიპოვა სააკაშვილის ტოქსიკოლოგიური ექსპერტიზის დასკვნა, რომლის ერთ-ერთ პირველ გვერდზე მითითებულია იმ მედიკამენტების ჩამონათვალი, რომლითაც მიხეილ სააკაშვილს სხვადასხვა სამედიცინო დაწესებულებაში მკურნალობდნენ. მათ შორის არის ისეთი მედიკამენტებიც, რომლებსაც დეივიდ სმიტი საშიშ მედიკამენტებს უწოდებს და მიუთითებს, რომ პრეპარატები ამერიკის შეერთებული შტატების საკვებისა და წამლების ადმინისტრაციის (FDA) ან მსოფლიო ჯანდაცვის ორგანიზაციის (WHO) მიერ დამტკიცებული არ არის. სააკაშვილისთვის დანიშნული 14 მედიკამენტიდან, ასეთი ჩამონათვალში 2 წამალია. საერთაშორისო სტანდარტით აკრძალულ მედიკამენტებზე ექსპერტი დასკვნაში წერს, რომ პრეპარატები შესაძლებელია "ბოროტად" იყოს გამოყენებული, რამაც შესაძლებელია გამოიწვიოს მწვავე მოწამვლა.

რაც შეეხება ომბუდსმენის კონსილიუმის დასკვნას, მიხეილ სააკაშვილის მდგომარეობა მე-4 ხარისხის კახექსიით არის შეფასებული და ის სხვა ქვეყნის მრავალპროფილურ კლინიკაშია გადასაყვანი.

14 დეკემბერს ევროპარლამენტის მიღებულ რეზოლუციაში, მათ შორის, საუბარია მიხეილ სააკაშვილის განთავისუფლების და სამკურნალოდ საზღვარგარეთ გადაყვანის საკითხზე. ევროპარლამენტი მოუწოდებს საქართველოს პრეზიდენტს, სალომე ზურაბიშვილს გამოიყენოს თავისი კონსტიტუციური პრეროგატივა მიხეილ სააკაშვილის საკითხის მოსაგვარებლად.