საქართველოს კათოლიკოს-პატრიარქმა, ილია II-მ მოქალაქეებს უკრაინისთვის ლოცვისკენ მოუწოდა.
"სამწუხაროდ, უკრაინაში რუსეთის მიერ წარმოებული საომარი მოქმედებები გრძელდება, რასაც ათასობით ადამიანის სიცოცხლე ეწირება.
მინდა მოვუწოდო ჩვენს მრევლს (როგორც საქართველოში, ისე უცხოეთში მყოფთ) მშვიდობისათვის ერთობლივი ლოცვისთვის.
ხვალ, ხუთშაბათს, თბილისის დროით 12:00-ზე, სადაც არ უნდა იმყოფებოდეთ (ტაძარში, სამსახურში, სახლში თუ ქუჩაში) შევეცადოთ, ყველამ ერთად შევავედროთ უფალს უკრაინა და მთელი მსოფლიო და ყოვლადწმინდა ღვთისმშობელს შევთხოვოთ დახმარება დიდი ძალის მქონე ამ ლოცვით:
„მოწყალებისა კარი განგვიღე, კურთხეულო ღვთისმშობელო, რათა რომელნი ესე შენ გესავთ, არა დავეცნეთ, არამედ განვერნეთ წინააღმდგომთა მტერთაგან, რამეთუ შენ ხარ ცხოვრება ნთესავისა ქრისტიანეთასა, ამინ“ (ვთქვათ სამჯერ).
ღმერთო, გადაარჩინე უკრაინა, გადაარჩინე საქართველო და მსოფლიო!
კვირას, 20 მარტს კი სასულიერო პირებს ეძლევათ კურთხევა, წირვის შემდეგ გადაიხადონ სავედრებელი პარაკლისი უკრაინაში მშვიდობისათვის და პანაშვიდი ამ ომში გარდაცვლილთათვის.
ღმერთმა შეისმინოს ჩვენი ლოცვა და შეგვიწყალოს, ამინ!". - წერია პატრიარქის განცხადებაში.
ეს პირველი განცხადებაა, როცა ილია მეორემ რუსეთის მიერ უკრაინაში დაწყებულ ომს ხაზი გაუსვა.
6 მარტის განცხადებაში პატრიარქმა თქვა, რომ "ომი ზოგიერთ ქვეყანაშია".
დახურვა