კლუბები და ფესტივალები რეგულაციების მკაფიოდ განსაზღვრას და საქმიანობის განახლებას ითხოვენ

კლუბების, ფესტივალების და ბარების წარმომადგენლები ხელისუფლებას მიმართავენ და ითხოვენ, საბოლოოდ და მკაფიოდ განისაზღვროს ის რეგულაციები, რომელიც განურჩევლად იმუშავებს ქალაქში მიმდინარე ყველა ღონისძიებაზე.

როგორც მიმართვაშია ნათქვამი, ივლისის ბოლო პერიოდის სათანადოდ ვერ გამოყენება უმძიმეს დარტყმას მიაყენებს კლუბებსა და ბარებში დასაქმებულ ათასობით ადამიანს.

მიმართვის ხელმომწერები აღნიშნავენ, რომ მთავრობის გადაწყვეტილებით, ღია სივრცეებში კულტურული ღონისძიებების აკრძალვაზე შეზღუდვა მოიხსნა. თუმცა, შრომის უსაფრთხოების ინსპექციამ  ელექტრონული მუსიკის საღამოები, კულტურულ ღონისძიების ნაცვლად, "გასართობ ღონისძიებად" მიიჩნია და ამის გამო, 17 და 18 ივლისს, ელექტრონული მუსიკის საღამოების ორგანიზატორები  10 000 ლარის ოდენობის თანხით დააჯარიმა. დღევანდელი მოცემულობით: ვინც ერთხელ უკვე დაჯარიმებულია 10 000 ლარად, განმეორებით ანალოგიური მოქმედების შემთხვევაში მისი მოქმედება სისხლის სამართლის დანაშაულად ჩაითვლება. სასჯელად კი მათ შორის მითითებულია, ჯარიმა და კომპანიის ლიკვიდაცია.

"დაუყოვნებლივ მოვითხოვთ  უფლებამოსილ უწყებებთან შეხვედრას, რათა ჩვენთან ერთად, საბოლოოდ და მკაფიოდ განისაზღვროს ის რეგულაციები, რომელიც განურჩევლად იმუშავებს ქალაქში მიმდინარე ყველა ღონისძიებაზე და რომლის მიხედვითაც საქმიანობის განახლება შეგვეძლება, არაუგვიანეს მომდევნო  პარასკევისა. ჩვენი სფეროს სპეციფიკიდან გამოდინარე, ივლისის ბოლო პერიოდის სათანადოდ ვერ გამოყენება უმძიმეს დარტყმას მიაყენებს ამ სფეროში დასაქმებულ ათასობით ადამიანს.  ჩვენს სფეროს სახელმწიფოსგან არ მიუღია ფინანსური დახმარება და საქმიანობის შეზღუდვის გაგრძელების შემთხვევაში რიგი დაწესებულებები გაქრობის წინაშე აღმოჩნდებიან. ათასობით თანამშრომელს კი ემუქრება სამსახურების დაკარგვა, რაც კიდევ უფრო დაამძიმებს სოციალურ ფონს“, - ნათქვამია განცხადებაში.

მიმართვას ხელს აწერენ: Altervision Group, Baghi Bauhaus, Bar Bassiani,  Cafe Gallery, Ciskari, Colibri,  Daisi,  Dedaena Bar,  Drama Bar,  Khidi, Lisi Rest, Mtkvarze, Mzesumzira,  Politika, Prince Bar,  Success Bar,  The Cultural and Creative Industries Union of Georgia, Tivi, Treeball, 303 HZ.