ქართული ოცნების თავმჯდომარე, ირაკლი კობაიძე 7-8 მარტის აქციებსა და პრაიდფესტის ძალადობრივ ჩაშლას ერთმანეთს ადარებს და ამბობს, რომ მარტის აქციების დროს "ვანდალიზმის და ძალადობა" ბევრად უხეში ფორმებით იყო გამოხატული. კობახიძე აცხადებს, რომ ქრონოლოგიურად ჯერ 7-8 მარტის აქციის საქმე უნდა გამოიძიონ, შემდეგ კი 8 ივლისს ჰომოფობიური ჯგუფების ძალადობრივი ქმედებები.
"ჯერ ქრონოლოგიურად უწევს 7-8 მარტის ძალადობას გამოძიება. ჯერ უნდა იყოს გამოძიებული 7-8 მარტის ძალადობა სათანადოდ, საჭიროა შესაბამისი ადამიანების ბოლომდე პასუხისგებაში მიცემა და ამის მერე მოვა, ალბათ, დრო, გამოძიებულ იქნეს ლისზე მომხდარი მოვლენები.
7-8 მარტს იყო უამრავი ფაქტი, მათ შორის ადამიანებზე ძალადობის ფაქტი. ცეცხლი არავისთვის წაუკიდებიათ ლისზე, ცეცხლი წაუკიდეს 7-8 მარტს მოძალადეებმა, ვანდალიზმის იყო ათასნაირი, რუსთაველი ლამის გადაწვეს, რუსთაველის თეატრს მიაწერეს ათასი სიბინძურე. ამის ნახევარიც კი არ მომხდარა ლისზე", - აცხადებს კობახიძე.
***
7-8 მარტს პარლამენტის წინ მოქალაქეები ქართული ოცნების მიერ რუსული კანონის განხილვას აპროტესტებდნენ. თბილისში პოლიციელებმა მშვიდობიანი აქცია წყლის ჭავლით, წიწაკის სპრეითა და ცრემლმდენი გაზით დაარბიეს.
8 ივლისს Tbilisi Pride-ის კვირეულის დასკვნითი ღონისძიება უნდა გამართულიყო. ჰომოფობიური და აგრესიულად განწყობილი ჯგუფები ღონისძიების დაწყებამდე ფესტივალის ტერიტორიაზე შეიჭრნენ, მაშინ, როდესაც ადგილზე მობილიზებული იყო პოლიცია. ჰომოფობიური და პრორუსული დაჯგუფება ალტ-ინფოს ლიდერები რამდენიმე კვირის განმავლობაში იმუქრებოდნენ, რომ ფესტივალს ჩაშლიდნენ. ტერიტორიაზე შეჭრის შემდეგ მათ დაარბიეს და დაწვეს კერძო საკუთრება, მოიპარეს ნივთები. დარბევის დროს არავინ დაშავებულა, რადგან ორგანიზატორებმა ფესტივალის ტერიტორიის დატოვება შეძლეს.
დახურვა