ნათია მეზვრიშვილი გამოკითხვაზე დაიბარეს

პარტია საქართველოსთვის ლიდერი ნათია მეზვრიშვილი გამოკითხვაზე დაიბარეს.

მეზვრიშვილი facebook-ზე წერს, რომ საგამოძიებო უწყებაში იმ ბრიფინგებთან დაკავშირებით დაიბარეს, რომელზეც ის მათი პარტიის წევრების მიმართ განხორციელებულ პოლიტიკურ ზეწოლაზე საუბრობდა. 

მეზვრიშვილი გამოკითხვაზე დაბარებას უსაფუძვლოს უწოდებს, თუმცა აღნიშნავს, რომ უწყებაში მივა.

"როგორც იცით, სისტემატურად ვატარებ ბრიფინგებს და პარტიის წევრების და მხარდამჭერების პოლიტიკური ნიშნით დევნის ფაქტებს ვაჟღერებ, რომლებიც ჩემთვის ცნობილი ხდება რეგიონული ოფისების ხელმძღვანელებისგან.

ბრიფინგზე გაჟღერებულ 4 ფაქტზე დღეს გამოკითხვაზე დამიბარა ყაზბეგის რაიონული სამმართველოს გამომძიებელმა ყაზბეგში, საქმეზე, რომელზეც როგორც აღმოჩნდა, გამოძიებაც კი არ არის დაწყებული (თუ ამ პოსტის მერე სასწრაფოდ არ დაიწყეს). აწარმოებენ ე.წ. მოკვლევას, რომელიც დიდი ხნის წინ გაუქმდა კანონით.

მიუხედავად უსაფუძვლოდ დაბარებისა (რომელიც დარწმუნებული ვარ პოლიტიკური ხელმძღვანელობისგან მოდის), რიგითი გამომძიებლის პატივისცემით, იმ სისტემის პატივისცემით, სადაც წლები ვიმუშავე და იმისთვის, რომ ხელისუფლების მხრიდან სპეკულაციები თავიდან ავირიდო, მივალ, ოღონდ მივალ იმ დროს, როცა არ მაქვს დაგეგმილი შეხვედრები წინასაარჩევნო კამპანიის ფარგლებში (აღნიშნული განვუმარტე გამომძიებელსაც).

ოცნების პოლიტიკურ ხელმძღვანელობას და შსს-ს მაღალ მენეჯმენტს კი გაფრთხილებთ:

ბრიფინგზე გაჟღერებული მაქვს 100-ზე მეტი ფაქტი. აქტიური წინასაარჩევნო კამპანია მაქვს და ყოველი ასეთი უაზრო დაბარება იწვევს ჩემს მოწყვეტას საარჩევნო პროცესისგან.

რეალური გამოძიება დადეთ ! აქ სულელი არავინაა. თითოეულ ფაქტზე შედეგისთვის აუცილებელი საგამოძიებო მოქმედებები ჩაატარეთ და პირველ რიგში, პოლიტიკური ნიშნით დევნის სისტემური ხასიათი გამოიძიეთ.

როგორც ჩანს, პარტიის წევრების და მხარდამჭერების პოლიტიკური ნიშნით დევნა არ იკმარეთ და ეხლა ამ ფორმით გადაწყვიტეთ მოგვწყვიტოთ საარჩევნო პროცესებს.

და ბოლოს, რიგითებს ნუ აკეთებინებთ ამას. ღირსებას ნუ ულახავთ და უხერხულში ნუ აყენებთ. თუ რამის თავი გაქვთ, გამოჩნდით და დებატებში დაგვისხედით", - წერს მეზვრიშვილი.

გიორგი გახარიას გუნდში საუბრობენ იმაზე, რომ მათი პარტიის წევრებზე პოლიტიკური ზეწოლა ხორციელდება.

7 სექტემბერს გამართულ ბრიფინგზე  ნათია მეზვრიშვილმა თქვა, რომ მმართველი გუნდი მათ წევრებს და მხარდამჭერებს სისტემურად ავიწროებს, აშინებს, ემუქრება და პარტიის დატოვებას ამ ფორმით აიძულებს.