რუსულმა ძალებმა ლუჰანსკის რეგიონში პავლოგრადის ხიდი გაანადგურეს, რომელიც სევეროდონეცკსა და ლისიჩანსკს ერთმანეთთან აკავშირებდა. ინფორმაციას ლუჰანსკის სამხედრო ადმინისტრაციის ხელმძღვანელი სერჰეი ჰაიდაი ავრცელებს.
ჰაიდაის თქმით, ხიდის განადგურება ევაკუაციისა და ჰუმანიტარული დახმარების მიწოდების პროცესს გაართულებს. თუმცა მან აღნიშნა, რომ ამ დროისთვის ქალაქებს შორის კავშირი არსებობს.
ჰაიდაის ცნობით, ოკუპანტებმა ხიდი 2014 წლის ივლისშიც გაანადგურეს, როცა ლისიჩანსკის გათავისუფლების შემდეგ რუსული ჯარები უკან იხევდნენ. მას შემდეგ ლისიჩანსკთან და სევეროდონეცკთან კავშირი ძნელად ხერხდებოდა. ხიდი ხელახლა 2016 წელს აშენდა.
სამხედრო ადმინისტრაციის ხელმძღვანელის ინფორმაციით, გუშინ ლუჰანკსიდან 57 ადამიანის ევაკუაცია შეძლეს.
„სევეროდონეცკში, ლისიჩანსკსა და ბოლგოროვკაში ახლა ტემპერატურა მაღალია. დაბომბვა 1 საათითაც კი არ ჩერდება. რუსები დღისით და ღამით იყენებენ არტილერიას. 57-ვე ევაკუირებულის სიცოცხლე ჩვენთვის ძალიან მნიშვნელოვანია დღეს. ისინი უსაფრთხოდ და დაცულად არიან“ - აცხადებს ჰაიდაი.
გუშინ, რუსული თავდასხმების შედეგად სევეროდონეცკში სულ მცირე 6 ადამიანი დაიღუპა.
დახურვა