ომის გმირების სახელობის დოღი, ყაზბეგში წელს პირველად ჩატარდა. დოღის დაწყებამდე ხევსურული ტრადიციული სუფრა - ტაბლა გაიშალა, ყველა ტრადიციის მიხედვით - დაილოცა, ამის შემდეგ კი ცხენოსნებმა ტაბლას 3-ჯერ შემოუარეს და სტარტის ადგილისკენ გაეშურნენ.
უძველესი ტრადიციების თანახმად, დოღში გარდაცვლილების ნათესავები მონაწილეობენ, თუმცა წელს ეს ტრადიცია შეიცვალა - აგვისტოს ომში გარდაცვლილების სახელობის შეჯიბრში ნებისმიერ მსურველს შეეძლო მონაწილეობა.
ყაზბეგში დოღმა სტარტი 12:30 წუთზე სოფელი ახალციხიდან დაიწყო და 13:00 საათზე ფინიშის ხაზი ჯუთაში გადაკვეთეს.
საბოლოოდ, დოღში 24 მხედარი მონაწილეობდა. პირველ ადგილზე გასული მთიული - გიორგი სისაურია, მეორე ადგილი - ხევსურმა - დაჩი ნაროზაულმა დაიკავა, მესამე საპრიზო ადგილი კი ხევსურმა - გელა არაბულმა მოიპოვა.
აგვისტოს ომის გმირების სახელობის დოღი ტრადიციად უნდა იქცეს - ამბობს ორგანიზატორი. გელა არაბულის თქმით, ყაზბეგში მოჯირითეები მომავალ წელსაც, 8 აგვისტოს შეიკრიბებიან.