ოპოზიციური პარტიები საქართველოში ამერიკის სახელმწიფო მდივნის ვიზიტს ეხმაურებიან და მაიკლ პომპეოს საერთო განცხადებით მიმართავენ. ოპოზიციური პარტიების აზრით, პოლიტიკური გარღვევისთვის ახლა საჭიროა უსაფრთხოების სფეროში დინამიკის ჩვენება, რაც აშშ-საქართველოს ორმხრივი თანამშრომლობის ახალ ეტაპზე გადაყვანას გულისხმობს, როგორიცაა ამერიკული სამხედრო ინფრასტრუქტურის საქართველოში განთავსება და NATO-ში გაწევრიანების გზაზე შემდგომ ეტაპზე გადასვლა.
ოპოზიციურ პარტიებში მიაჩნიათ, რომ არჩევნების გაყალბება, სასამართლოს პოლიტიზაცია და პოლიტპატიმრები, პოლიტიკური ოპონენტების დევნა, დასავლური ინვესტიციებისთვის ხელის შეშლა და სტრატეგიული მნიშვნელობის საერთაშორისო პორტის ანაკლიის მშენებლობაზე უარის თქმა - ეს ის ნიშნებია, რაც სწორედ საქართველოს დემოკრატიულ უკუსვლაზე მიუთითებს.
"აშშ-ს სახელმწიფო მდივანი მაიკლ პომპეო საქართველოში იმ დროს ჩამოვიდა როცა ჩვენი ქვეყნისთვის, რეგიონისთვის და მთელი ევროატლანტიკური სივრცისთვის მნიშვნელოვანი საფრთხეები და ახალი შესაძლებლობები გამოჩნდა. პუტინის რუსეთი და სხვა ტოტალიტარული რეჟიმები მნიშვნელოვან საფრთხეს უქმნიან რეგიონში მშვიდობას და თავისუფალი სამყაროს უსაფრთხოებას. სახელმწიფო მდივნის ვიზიტი მკაფიო გზავნილია რომ აშშ რჩება რეგიონში და დგას მისი პარტნიორების გვერდით, იცავს მეგობრების სუვერენიტეტსა და თავისუფლებას. პოლიტიკური გარღვევისთვის ახლა საჭიროა უსაფრთხოების სფეროში დინამიკის ჩვენება, რაც აშშ-საქართველოს ორმხრივი თანამშრომლობის ახალ ეტაპზე გადაყვანას გულისხმობს, როგორიცაა ამერიკული სამხედრო ინფრასტრუქტურის საქართველოში განთავსება და NATO-ში გაწევრიანების გზაზე შემდგომ ეტაპზე გადასვლა. პუტინის რუსეთი თავისუფალი ქვეყნების სუვერენიტეტს, ამ ქვეყნებში დემოკრატიული სისტემის ეროზიის გზითაც ებრძვის, სწორედ ამიტომაა განსაკუთრებული შეშფოთების საგანი ის რასაც ივანიშვილი აკეთებს საქართველოში", - ნათქვამია განცხადებაში.
ოპოზიციური პარტიები აცხადებენ, რომ თავისუფალმა სამყარომ ფხიზლად უნდა მიადევნოს თვალი დემოკრატიული უკუსვლის ნიშნებს საქართველოში. პარტიებს მიაჩნიათ, რომ ტოტალიტარული და ავტორიტარული რეჟიმების თავისუფალ სამყაროსთან დაპირისპირებაში, დემოკრატიასთან ერთად საკვანძო მნიშვნელობისაა ეკონომიკური თავისუფლების მოპოვება.
"ეს რეჟიმები აკრძალული მეთოდებით იბრძვიან თავისუფალი ბაზრის წინააღმდეგ. საჭიროა დასავლეთის მოკავშირეებს ჰქონდეთ ლეგიტიმური უპირატესობა, რაც თავისუფალ ვაჭრობაზე ხელშეკრულებასა და მეტ ამერიკულ ინვესტიციას გულისხმობს, მათ შორის გეოპოლიტიკურად მნიშვნელოვან პროექტებში, როგორიცაა ანაკლიის ღრმაწყლოვანი პორტის მშენებლობა. საქართველომ უნდა მოახერხოს დემოკრატიზაციის ახალ ეტაპზე გადასვლა, რასაც საფრთხეს უქმნის ივანიშვილის მხრიდან ძალაუფლების მიტაცება და დემოკრატიული ინსტიტუტების რღვევა. ჩვენი ვალდებულებაა ხელი შევუშალოთ ამ პროცესს, მივაღწიოთ გამჭვირვალე არჩევნების ჩატარებას თავისუფალ სამყაროსთან ერთად და მოვახერხოთ თავისუფალი ქვეყნის მშენებლობა", - ნათქვამია განცხადებაში.
მიმართვას ხელს შემდეგი ოპოზიციური პარტიები აწერენ:
ევროპული საქართველო; სტრატეგია აღმაშენებელი; ახალი პოლიტიკური ცენტრი გირჩი; მოძრაობა ლელო; საქართველოსთვის ერთიანი ნაციონალური მოძრაობა; ლეიბორისტული პარტია; მოქალაქე; თავისუფალი დემოკრატები ახალი საქართველო; რესპუბლიკური პარტია; ეროვნულ დემოკრატიული პარტია; ევროპული დემოკრატები; ქრისტიან კონსერვატიული პარტია; მოძრაობა სახელმწიფო ხალხისათვის; ემსახურე საქართველოს სამართლიანობისთვის; სამოქალაქო ალიანსი თავისუფლებისათვის; თავისუფლება; ქრისტიან დემოკრატიული მოძრაობა; ახალი ქრისტიან დემოკრატები; კანონი და სამართალი; გამარჯვებული საქართველო; თავისუფალი საქართველო;
ამერიკის სახელმწიფო მდივანი მაიკლ პომპეო საქართველოს გუშინ, 17 ნოემბერს ეწვია. პომპეო საქართველოს პრეზიდენტს სალომე ზურაბიშვილს, პრემიერს გიორგი გახარიასა და პატრიარქს ილია II შეხვდა. პომპეო არასამთავრობო ორგანიზაციების წარმომადგენლებსაც შეხვდება, რის შემდეგაც საქართველოს დატოვებს. შეხვედრები მედიისთვის დახურულია.
პარალელურად, ოპოზიცია და აქტივისტები რამდენიმე ადგილზე მდუმარე აქციას მართავენ.
დახურვა