სასამართლომ ცესკოს სერვერებზე მონაცემების დაცვაზე გახარიას პარტიის მოთხოვნა არ დააკმაყოფილა

სასამართლომ არ დააკმაყოფილა გახარია საქართველოსთვის მოთხოვნა ცესკოს სერვერებზე და ხმის მიცემის აპარატებში არსებული მონაცემების გადაუდებელი აუცილებლობით დაცვაზე. ინფორმაციას გახარიას პარტია ავრცელებს და აღნიშნავს, რომ საქართველოს პროკურატურა "ყალბი გამოძიების ფარგლებში ცდილობს ვერიფიკაციის აპარატების წაღებას".

პარტიაში აღნიშნავენ, რომ შესაძლოა, არჩევნების გაყალბების უმნიშვნელოვანესი მტკიცებულებები განადგურდეს.

"როგორც მოსალოდნელი იყო, ცესკოსთან ერთად პროკურატურაც ჩაერთო სიების და სხვა მტკიცებულებების ფალსიფიკაციის პროცესში. სასამართლომ არ დააკმაყოფილა ჩვენი მოთხოვნა ცესკოს სერვერებზე და ხმის მიცემის აპარატებში არსებული მონაცემების გადაუდებელი აუცილებლობით დაცვაზე, ხოლო პროკურატურა ყალბი გამოძიების ფარგლებში ცდილობს ვერიფიკაციის აპარატების წაღებას.

ეს ნიშნავს იმას, რომ შესაძლოა არჩევნების გაყალბების უმნიშვნელოვანესი მტკიცებულებები განადგურდეს, რაც აზრს უკარგავს ნებისმიერ ობიექტურ გამოძიებას, ნამდვილი სიების გამოქვეყნებას, რაც თავის მხრივ სისხლის სამართლის დანაშაულია.

როგორც თავიდანვე ვამბობდით, ვერიფიკაციის აპარატები და მათში არსებული ინფორმაცია შესაძლოა იყოს გაყალბების მთავარი მტკიცებულება. ამიტომ ცდილობს პროკურატურა კონტროლის აღებას ყალბი გამოძიების ფარგლებში და ფაქტობრივად მძევლად აჰყავს როგორც მტკიცებულებები, ისე სიმართლის დადგენის მთლიანი პროცესი"- ნათქვამია განცხადებაში.

განცხადებაში ნათქვამია, რომ ცესკოს პერსონალურ მონაცემთა კანონი, მაღალი საჯარო ინტერესიდან გამომდინარე, ავალდებულებდა ამ მონაცემების გასაჯაროებას.

"ცესკო თითქმის 10 დღეა ინფორმაციას მალავს, არ ასახელებს შენახვის ვადას და პროკურატურასთან ერთად ხელს უწყობს მტკიცებულებების განადგურებას.

ამის დასტურია შემდეგი:

• 29 ოქტომბერს მოვითხოვეთ სიების გასაჯაროება;

• 30 ოქტომბერს პროკურატურამ ცესკოს მიმართვის საფუძველზე ყალბი გამოძიება დაიწყო;

• 1 ნოემბერს მივმართეთ სასამართლოს და მოვითხოვეთ მტკიცებულებების დაცვა;

• 1 ნოემბერს ცესკოს თავმჯდომარემ იმედის ეთერში სწორედ პროკურატურისთვის გადაცემაზე გააკეთა მინიშნება.

სწორედ 1 ნოემბერს მიმართა პროკურატურამ ცესკოს. ანუ, ცესკო და პროკურატურა, ოცნებასთან ერთად, კოორდინირებულად მოქმედებდნენ"- ნათქვამია განცხადებაში.