logo
ENG



სუს-მა თბილისის აეროპორტში ისლამური სახელმწიფოს წევრი, საქართველოს მოქალაქე დააკავა

08 დეკ 202211:48
3 წუთის საკითხავი
 
2022/12/08/4zpcz5sxnsz3q8h.jpg

სახელმწიფო უსაფრთხოების სამსახურმა თბილისის საერთაშორისო აეროპორტში ისლამური სახელმწიფოს წევრი, საქართელოს მოქალაქე ცისკარა ტოხოსაშვილი დააკავა.

სუს-ის ინფორმაციით, ტოხოსაშვილმა საქართველო 2015 წელს დატოვა, ახლო აღმოსავლეთში გაემგზავრა და რეგიონში მოქმედ ტერორისტულ ორგანიზაცია "ისლამურ სახელმწიფოს" შეუერთდა.

"ტოხოსაშვილი, იგივე „ემირი ისა“, საკმაოდ გავლენიან ფიგურად ითვლებოდა "ისლამური სახელმწიფოს" წევრებს შორის. იგი აქტიურად მონაწილეობდა სირიისა და ერაყის ტერიტორიაზე ტერორისტულ აქტივობებსა და მიმდინარე საბრძოლო მოქმედებებში. გარკვეული პერიოდის განმავლობაში ხელმძღვანელობდა ტერორისტული ორგანიზაციის ერთ-ერთ დანაყოფს კონფლიქტის ზონაში. მას ახლო ურთიერთობა აკავშირებდა ტერორისტულ ორგანიზაცია "ისლამური სახელმწიფოს" სხვადასხვა გავლენიან ლიდერთან.

აღსანიშნავია, რომ 2019 წელს, ერთობლივი ოპერაციის შედეგად, ტერორიზმის ბრალდებით დააკავეს ცისკარა ტოხოსაშვილის უმცროსი ძმა ცეზარ ტოხოსაშვილი - „ისლამური სახელმწიფოს“ ემირი ალ-ბარა შიშანი. ის სასჯელს საქართველოში იხდის.

კონტრტერორისტულ ცენტრში ცისკარა ტოხოსაშვილის მიმართ გამოძიება მიმდინარეობს საქართველოს სსკ-ის 328-ე მუხლით, უცხო ქვეყნის ტერორისტულ ორგანიზაციაში გაერთიანებისა და ტერორისტულ საქმიანობაში დახმარების ფაქტზე. ბრალდება სასჯელის სახით ათიდან ჩვიდმეტ წლამდე პატიმრობას ითვალისწინებს", - წერია სუს-ის განცხადებაში.


close დახურვა