ტურავა: ჩვენ რომ გვდომოდა შავ-ბნელი გადაწყვეტილების მიღება, სხდომას საერთოდ არ ჩავატარებდით

საკონსტიტუციო სასამართლოს თავმჯდომარე, მერაბ ტურავა ამბობს, რომ სასამართლოს შეეძლო იმპიჩმენტის საკითხი დახურულ კარს მიღმა გადაეწყვიტა, თუმცა მათ მიზანშეწონილად სხდომის ჩატარება მიიჩნიეს.

"თქვენთვის ჭიქაში ხმაურის თუ ქარიშხლის ატეხა და წინასწარ იმის თქმა, რომ ერთი მხარის ან მეორე მხარის... საზოგადოებაში რომ არის კითხვები, თქვენ ჟურნალისტები ხართ, თვითონაც კვალიფიციურები, კითხვები უნდა გამომდინარეობდეს რეალური ფაქტობრივი გარემოებებიდან. ერთხელაც ხაზი არ გაგისვიათ იმისთვის, რომ სასამართლოს შეეძლო ერთი თვის ვადაში მხარეთა დაუსწრებლად, ერთი და მეორეს მონაწილეობის გარეშე, თვითონ დახურულ კარს მიღმა დაეწერა დასკვნა, მაგრამ სასამართლომ ჩათვალა, რომ პროცესი უნდა ყოფილიყო გამჭვირვალდა. ჩვენ რომ გვდომოდა შავ-ბნელი გადაწყვეტილების მიღება, ამ სხდომას საერთოდ არ ჩავატარებდით. აბსოლუტურად და სრულიად თავისუფალი ვარ", - თქვა ტურავამ ჟურნალისტებთან.

დღეს საკონსტიტუციო სასამართლოში პრეზიდენტის იმპიჩმენტის წარდგინების განხილვა გრძელდება. 

საქმეს პლენუმი განიხილავს. პრეზიდენტი პროცესს არ ესწრება. მისი წარმომადგენლები კი თამარ ჩუგოშვილი და მაია კოპალეიშვილი არიან. 

გადაწყვეტილების მისაღებად პლენუმს 2 კვირა აქვს. თუ საკონსტიტუციო სასამართლო სალომე ზურაბიშვილის მხრიდან კონსტიტუციის დარღვევას დაადგენს, პოლიტიკური პროცესი პარლამენტში გადაინაცვლებს. 

პრეზიდენტის იმპიჩმენტისთვის საჭიროა პარლამენტის 2/3, ანუ 100 დეპუტატის ხმა. ამ ეტაპისთვის ქართულ ოცნებას საჭირო მხარდაჭერა არ აქვს. 

პირველ სექტემბერს ცნობილი გახდა, რომ ქართული ოცნება სალომე ზურაბიშვილის წინააღმდეგ იმპიჩმენტის პროცედურას იწყებს. მიზეზად პარტიაში მთავრობის უარის მიუხედავად, პრეზიდენტის ევროპაში გამგზავრება დაასახელეს, რითაც მან "უხეშად დაარღვია კონსტიტუცია".

30 აგვისტოს საქართველოს მთავრობამ პრეზიდენტ სალომე ზურაბიშვილის ევროპაში ვიზიტის პარალელურად განცხადება გამოაქვეყნა და აღნიშნა, რომ მას ყველა მოთხოვნილ ვიზიტზე უარი უთხრეს, მათ შორის, უკრაინაში.