აშშ-ის უზენაესი სასამართლო დათანხმდა, განიხილოს დონალდ ტრამპის აპელაცია სასამართლო გადაწყვეტილებაზე, რომელიც ყოფილ პრეზიდენტს კოლორადოს შტატში რესპუბლიკური პარტიის პრაიმერიზში მონაწილეობას უკრძალავს. საქმეს თებერვალში განიხილავენ და გადაწყვეტილება მთელი ქვეყნის მასშტაბით გამოიყენება.
კოლორადოს უზენაესი სასამართლოს გადაწყვეტილებით, დონალდ ტრამპი, 2021 წლის 6 იანვრის არეულობაში მისი როლის გამო, პრაიმერიზის არჩევნების სიიდან ამოღებულ უნდა იქნას.
იურიდიული თვალსაზრისით საკითხი ეხება იმას, რომ ტრამპის მიმართ გამოიყენება თუ არა კონსტიტუციის შესწორება, რომელიც სამოქალაქო ომის დროს მიიღეს. აშშ-ის კონსტიტუციის მე-14 შესწორება კრძალავს ფედერალური თანამდებობის დაკავების ნებისმიერისთვის, ვინც "აჯანყებაში ან ამბოხებაში მონაწილეობდა". ყოფილი პრეზიდენტის ადვოკატები მიიჩნევენ, რომ ეს ტრამპს არ ეხება.
მისი ადვოკატები ამტკიცებენ, რომ "კოლორადოს უზენაესი სასამართლოს გადაწყვეტილება კოლორადოში მილიონობით ამომრჩეველს ხმის მიცემის უფლებას არაკონსტიტუციურად ჩამოართმევს და, სავარაუდოდ, გამოყენებული იქნება როგორც შაბლონი ათობით მილიონი ამომრჩევლის საარჩევნო უფლების ჩამორთმევისთვის მთელი ქვეყნის მასშტაბით".
კოლორადოს რესპუბლიკურმა პარტიამ უკვე დაიმუქრა შტატში პრაიმერიზის გაუქმებისა და კოკუსის პროცესის დაწყების შესახებ, რომლის დროსაც პარტიის წევრები საპრეზიდენტო კანდიდატურას კენჭისყრის გარეშე, არაფორმალურ შეხვედრებზე, ღია კენჭისყრით ამტკიცებენ.
კოლორადოს უზენაესი სასამართლოს გადაწყვეტილება არის პირველი შემთხვევა აშშ-ის ისტორიაში, როდესაც მე-14 შესწორება საპრეზიდენტო კანდიდატის დისკვალიფიკაციისთვის გამოიყენეს.
კოლორადოს შტატის გარდა, პრაიმერიზიდან ტრამპის დისკვალიფიკაციის გადაწყვეტილება მენის შტატის სახელმწიფო მდივანმაც მიიღო. ყოფილი პრეზიდენტის ადვოკატებმა აპელაციით ადგილობრივ სასამართლოს მიმართეს. მინესოტისა და მიჩიგანის სასამართლოებმა ტრამპის დისკვალიფიკაცია უარყვეს.
დახურვა