ფეისბუქზე პანდას სახელით ახალი გვერდი გამოჩნდა

სოციალურ ქსელ ფეისბუქში „პანდას“ სახელით ახალი გვერდი გამოჩნდა, სადაც ამ დროისთვის მხოლოდ ერთი ვიდეოა და დაზუსტებით არ შეიძლება ითქვას არის თუ არა ეს ის სარეკლამო კომპანია, რომლის ფეისბუქის ანგარიშებიც თავად სოციალურმა ქსელმა წაშალა.

Facebook-მა თავისი პლატფორმიდან 418 ქართული ანგარიში, კერძოდ 39 პროფილი, 344 გვერდი, 13 ჯგუფი და ინსტაგრამის 22  ანგარიში გააუქმა, რომლებიც ჩართულნი იყვნენ "კოორდინირებულ არაავთენტურ ქცევაში", რაც პროსახელისუფლებო, ანტიოპოზიციური და ანტიდასავლურ ნარატივში გამოიხატებოდა. 

გვერდების მართვაში ქართულ ინტერნეტსივრცეში ერთ დროს ცნობილი მუსიკალური ჯგუფი „პანდა“ იყო ჩართული, რომელიც შემდეგ სარეკლამო კომპანიად გადაკეთდა.

„Facebook-მა საქართველოში 344 ფეისბუქგვერდი, 39 პროფილი, 22 ინსტაგრამის ანგარიში და 13 ფეისბუქის ჯგუფი წაშალა. ეს გვერდები ჯამში 440 000-ზე მეტ ანგარიშს ჰქონდა გამოწერილი. ჯამში, ამ გვერდების რეკლამირებაზე 316 000$-მდე დაიხარჯა. გვერდები შემჩნეული იყვნენ სამთავრობო პროპაგანდაში“, - წერია Facebook-ის მიერ გავრცელებულ ინფორმაციაში.

Facebook-ის გადაწყვეტილების შემდეგ, „პანდამ“ განცხადება გაავრცელა, რომელშიც მედიასაშუალებები დეზინფორმაციის გავრცელებასა და ბულინგში დაადანაშაულა.  

განცხადებასთან ერთად, „პანდამ“ კლიპიც გაავრცელა. ამის შემდეგ სოციალურ ქსელში გვერდი წაშლილი იყო და აღარ იძებნებოდა. 

აღსანიშნავია, რომ „პანდამ“ ფეისბუქის ბრალდებები დაადასტურა. კომპანიის წევრის განცხადებით, ისინი ფეისბუქის საშუალებით ოპოზიციას, კერძოდ კი „ნაციონალურ მოძრაობას“ „აკრიტიკებდნენ“, თუმცა, ეს ქმედება არა „ქართული ოცნების სიყვარულით“ არამედ „დიქტატურის შიშით“ იყო განპირობებული.