ქობულეთის მერია ფალავანდიშვილის მიერ გრაფიტის დაზიანებას გმობს და ფაქტის შესწავლას გეგმავს

ქობულეთის მერია ჰომოფობიური და ძალადობრივი ჯგუფის ლიდერის გურამ ფალავანდიშვილის მიერ სექსუალური განათლების შესახებ გრაფიტის დაზიანების ფაქტს გმობს.

როგორც მერიაში აცხადებენ, ფაქტს ენერგო-პრო ჯორჯიასთან ერთად შეისწავლიან.

"მიმდინარე წელს ორგანიზაცია GirlsWave-ის მიერ შემოვიდა წერილი, სადაც ორგანიზაციის წევრები განმარტავდნენ, რომ ახორციელებდნენ პროექტს შეიმეცნე. აღნიშნული პროექტის პარგლებში ისინი ენერგო-პრო ჯორჯიას ქვესადგურების მოხატვას გეგმავდნენ. ორგანიზაციამ წარმოადგინა ესკიზები და ნებართვა ენერგო-პრო ჯორჯიასგან. აღვნიშნავთ, რომ ფაქტის შესწავლა მოხდება ენერგო-პრო ჯორჯიასთან ერთად. 

ასევე გვსურს აღვნიშნოთ, რომ ვგმობთ მსგავსს საქციელს (გრაფიტის დაზიანების ფაქტს).  ჩვენს ქვეყანაში სიტყვის გამოხატვის თავისუფლება არის მნიშვნელოვანი ფაქტორი დემოკრატიული საზოგადოების ჩამოყალიბებაში", - აცხადებენ მერიაში.

ცნობისთვის, ჰომოფობიური და ძალადობრივი ჯგუფის ხელმძღვანელმა გურამ ფალავანდიშვილმა ქობულეთში სექსუალური განათლების შესახებ გრაფიტი გუშინ, 22 აგვისტოს დააზიანა. ვიდეო ერთ-ერთ გვერდზე გავრცელდა, რომელშიც ჩანს, თუ როგორ შლის ნაწერს ფალავანდიშვილი, პარალელურად კი ქობულეთის მერს ცემით ემუქრება.