"ოცნების" პრეზიდენტი, მიხეილ ყაველაშვილი ირწმუნება, რომ BBC-ის მიერ გავრცელებული ინფორმაცია, რომლის მიხედვითაც, 2024 წლის აქციებზე შსს დემონსტრანტების წინააღმდეგ პირველი მსოფლიო ომის დროინდელ ქიმიურ ნივთიერებას იყენებდა, მიზნად საქართველოს ხელისუფლების "გაშავებას" ისახავს.
იგი "ოცნების" სამართალდამცავ ორგანოებს მოუწოდებს, "ყველაფერი სრულყოფილად გამოიძიონ."
"დაველოდოთ გამოძიებას. ჩვენ ვართ სრულყოფილი, პასუხისმგებლიანი ხელისუფლება. მე მოვუწოდებ სამართალდამცავ ორგანოებს, პროკურატურას, სახელმწიფო უსაფრთხოების სამსახურს, რომ სრულყოფილად იქნას გამოძიებული და კიდევ ერთხელ უნდა ვიცოდეთ, რომ ვისაც რა მოეპრიანება და ესე დაუპირისპირდება საკუთარ ქვეყანას, საკუთარ სახელმწიფოს, ესე ჩირქს სცხებს და ჩვენ ხომ ვიცით, ეს რატომ კეთდებაა? რომ ახალი, ასე ვთქვათ, ვერსია შემოიტანეს. ვერაფრით ვერ მოხდა იმ რადიკალური ფრთის აგორება ისე, რომ საზოგადოება იყოს ამ ყველაფერში ჩართული.
მე კიდევ ერთხელ ჩვენს საზოგადოებას მოვუწოდებ, რომ იყოს მშვიდად, იყოს ინფორმირებული, კარგად გაანალიზოს ეს პროცესები როგორ არის ერთმანეთთან დაკავშირებული და ქართული სახელმწიფო დღეს არის ძალიან ძლიერი, რომ მსგავს გამოწვევებს გაუძლოს. მე კიდევ ერთხელ მოვუწოდებ საქართველოს სამართალდამცავ ორგანოებს, რომ ყველაფერი იყოს გამოძიებული სრულყოფილად, რომ ჩვენს მოქალაქეებს ჰქონდეთ სრულყოფილი პასუხი ამ მსგავს ქმედებებზე.
საზოგადოებას მინდა მივმართო, რომელიც ძალიან კარგად აანალიზებს ამ ყველაფერს, მაგრამ ჩემს, ასე ვთქვათ, შეხედულებასაც გავუზიარებ, რომ ეს ყველაფერი ერთმანეთთან დაკავშირებულია იმ თვალსაზრისით, რომ როგორმე მოხდეს საქართელოს დღევანდელი ხელისუფლების, ასე ვთქვათ, გაშავება. ამას ემსახურება ეს ყველაფერი და მიმართეს ისეთ მეთოდებს, რომ ვერცერთმა მეთოდმა - რუსული ხელისუფლებაა - ფაქტი ვერ დადებს, ყალაბებული არჩევნები - ფაქტი ვერ დადეს, არ ვიცი კიდევ რა მაგალითები მოვიყვანოთ, ვერცერთი მათი დაკვეთილი ღონისძიებები, რომელიც საქართველოს ხელისუფლების წინააღმდეგ იყო სამართლებრივადაც მიმართული ვერცერთი ვერ დამტკიცდა და საქართველოს ხელისუფლება ყველასთან იყო მართალი. დღეს აღმოჩნდა რომ ამ ყველაფერს ვერ ერევიან, არ აწყობთ ის, რომ საქართველოს ხელისუფლება არის ძლიერი, ეროვნულ ინტერესზე მდგარი და კარგად ართმევს თავს საკუთარ მოვალეობებს, აქედან გამომდინარე, ეს არის ერთ-ერთი შემდგომი ეტაპი იმისთვის, რომ როგორმე მოხდეს საქართველოს ხელისუფლების გაშავება", - აცხადებს "ოცნების" პრეზიდენტი.
***
BBC ვრცელ სტატიას აქვეყნებს, რომელშიც წერია, რომ მათ მიერ მოპოვებული მტკიცებულებები მიუთითებს, რომ გასულ წელს საქართველოს ხელისუფლებამ ანტისახელისუფლებო დემონსტრაციების დასაშლელად პირველი მსოფლიო ომის დროინდელი ქიმიური ნივთიერება გამოიყენა.
BBC-ის თანახმად, მათმა სამსახურმა ისაუბრა ქიმიური იარაღის ექსპერტებთან, საქართველოს საპოლიციო სპეცრაზმის ინფორმატორებთან და ექიმებთან და აღმოაჩინა, რომ არსებული მტკიცებულებები მიუთითებს ნივთიერების გამოყენებაზე, რომელსაც ფრანგული სამხედრო უწყება "კამიტეს" უწოდებდა - ეს ნივთიერება ბრომობენზილ ციანიდია, რომელიც მოკავშირეებმა პირველ მსოფლიო ომში გამოსაყენებლად შექმნეს.
სტატიის გამოქვეყნების შემდეგ, ქართულმა ოცნებამ განცხადება გაავრცელა და განაცხადა, რომ ის მათ წინააღმდეგ "ცრუ ბრალდებებს" შეიცავს. პარტია აცხადებს, რომ BBC-ის მიერ გავრცელებული "მძიმე და დაუდასტურებელი ბრალდებების" გამო, საერთაშორისო სასამართლოში სამართლებერივ დავას იწყებს.
მოგვიანებით, BBC-ის მიერ გავრცელებულ მასალაზე სუს-მა გამოძიება დაიწყო.
დახურვა