"ქართული ოცნების" ყოფილი დეპუტატის, ელდარ კურტანიძის, წინააღმდეგ ბრალი დამძიმდა - მას საკუთრების უფლების დარღვევასაც ედავებიან.
საუბარია იმ საცხოვრებელ სახლზე, სადაც კურტანიძემ ყოფილი მეუღლე, ხათუნა მიქაცაძე, ფიზიკურად იძალადა. გამოძიების ინფორმაციით, შემთხვევა რამდენიმე თვის წინ ქობულეთში მოხდა - კურტანიძე ყოფილ ცოლს სახლში მიუვარდა და ფიზიკური დაზიანებები მიაყენა. ექსპერტიზის დასკვნით, მიქაცაძეს დაზიანებები სხეულის სხვადასხვა ნაწილზე აღენიშნებოდა.
მოქმედი კანონმდებლობის თანახმად, აღნიშნული მუხლი ორ წლამდე თავისუფლების აღკვეთას ითვალისწინებს, ხოლო თუ ქმედება ძალადობით არის ჩადენილი - სამ წლამდე.
ჯამში, პროკურატურა კურტანიძეს ოთხ მუხლით ედავება:
- ოჯახის წევრის მიმართ ძალადობა, რამაც ფიზიკური ტკივილი გამოიწვია;
- ოჯახის წევრის ნივთის განზრახ დაზიანება, რამაც მნიშვნელოვანი ზიანი გამოიწვია (11 პრიმა 187-ე მუხლი, ნაწილი I);
- ოჯახის წევრის მიმართ დამცავი ორდერით გათვალისწინებული მოთხოვნების და ვალდებულებების შეუსრულებლობა — ორი ეპიზოდი (11 პრიმა 381-ე პრიმა მუხლი, ნაწილი I);
- და ახლა უკვე — საკუთრების უფლების დარღვევა.
„ფიზიკური ძალადობის ნაწილში ვცნობ თავს დამნაშავედ, დანარჩენში - არა,“ - განუცხადა კურტანიძემ მედიას.
დღეს ბათუმის საქალაქო სასამართლოში გაიმართა წინასასამართლო სხდომა, სადაც დაცვის მხარე მის გათავისუფლებას გირაოს საფუძველზე მოითხოვდა, თუმცა მოსამართლე ნინო სახელაშვილმა ბრალდებული პატიმრობაში დატოვა.
გარდა ამისა, დღეს ცნობილი გახდა, რომ თბილისის კრიმინალური პოლიციის დეპარტამენტი კურტანიძის მიმართ კიდევ ერთ საქმეს იძიებს - ამჯერად, ფიზიკურ ძალადობაში მას მეორე მეუღლე ადანაშაულებს.
დახურვა