ჩხაიძე: ქვეყანაში გრიპის ვირუსის სტატისტიკა აღმავალია

იაშვილის სახელობის ბავშვთა ცენტრალური საავადმყოფოს სამედიცინო დირექტორის ივანე ჩხაიძის თქმით, ქვეყანაში გრიპის ვირუსის სტატისტიკა გაზრდილია.

როგორც მან აღნიშნა, 2023 წლის ბოლო კვირებთან შედარებით, ლაბორატორიულად დადასტურებული გრიპის შემთხვევების რაოდენობა, პრაქტიკულად გაორმაგებულია.

ჩხაიძემ ისაუბრა იმ სიმპტომებზე, რომლებიც გრიპის ვირუსის დროს ვლინდება და თქვა, რომ ბავშვების შემთხვევაში არსებულ სიმპტომებს ემატება უმადობა, ძილიანობა და საჭიროა, რომ პროცესი ექიმის მიერ იყოს მართული.

"ქვეყანაში გრიპის ვირუსის სტატისტიკა აღმავალ მრუდზეა. თუ გადავხედავთ დაავადებათა კონტროლის ეროვნული ცენტრის მონაცემებს, 2023 წლის 49-ე და 51-ე კვირის მონაცემებს თუ შევადარებთ, პრაქტიკულად გაორმაგებულია, ლაბორატორიულად დადასტურებული გრიპის შემთხვევების რაოდენობა. თუ 49-ე კვირას ეს ციფრი 16% იყო, 2 კვირის შემდეგ ეს მაჩვენებელი 27 % გახდა. ნებისმიერი ადამიანი, რომელსაც ტემპერატურა აქვს 38 გრადუსი და უფრო მეტი, ძლიერი თავის ტკივილი, სახსრების ტკივილი, კუნთების ტკივილი, საერთო სისუსტე მიუთითებს გრიპის ვირუსის არსებობაზე. ბავშვებში ამას ემატება მომატებული ძილიანობა, საკვებზე უარის თქმა, ჭირვეულობა. ეს ყველაფერი გრიპის ვირუსის არსებობაზე მიუთითებს, განსაკუთრებით მცირე ასაკის ბავშვებში ეს შემთხვევა უნდა იყოს არამხოლოდ ოჯახის წევრებს, არამედ ექიმის მიერ მართული"- თქვა ჩხაიძემ.