საქართველოს ძალოსნობის ფედერაცია და კონკრეტულად ფედერაციის პრეზიდენტი კახი კახიაშვილი პრემიერის გიორგი გახარიასა და ძალოსნების, მათ შორის მსოფლიო ჩემპიონისა და რეკორდსმენის ლაშა ტალახაძის შეხვედრის შესახებ განცხადებას ავრცელებს.
„ფორმულა“ განცხადებას უცვლელად გთავაზობთ:
„ვეხმაურებით ბოლო დღეებში განვითარებულ მოვლენებს.
მოგეხსენებათ, რომ რამდენიმე დღის წინ საქართველოს 2019 წლის საუკეთესო სპორტსმენებს საქართველოს პრემიერმა გიორგი გახარიამ უმასპინძლა, რაც მიღებული პრაქტიკაა. ყოველთვის, ნებისმიერი მმართველობის დროს ყველა ქვეყნის მთავრობა სპორტსმენებს ხვდება და ასე მოხდა ამჯერადაც. ქართველი წარმატებული სპორტსმენები პრემიერთან იმყოფებოდნენ ტრადიციულ შეხვედრაზე, სადაც სამახსოვრო ფოტოებიც გადაიღეს და მათ შორის იყო ჩვენი ოლიმპიური, მსოფლიოსა და ევროპის ჩემპიონი, მრავალგზის რეკორდსმენი და მსოფლიოს საუკეთესო ძალოსანი ლაშა ტალახაძეც.
სამწუხაროდ, საქართველოს მთავრობის ფეისბუქ გვერდზე გავრცელებულმა სპორტსმენთა ფოტომ საზოგადოების ნაწილის უარყოფითი რეაქცია გამოიწვია. კაცობრიობამ სპორტი შექმნა მსოფლიო ერების დასაახლოებლად და ადამიანების გასაერთიანებლად. სპორტი მშვიდობის სიმბოლოა დედამიწაზე. სპორტული ოლიმპიადები, ფესტივალები და ჩემპიონატები მნიშვნელოვანია ქვეყნის მიერ საკუთარი ძალების და ნიჭიერების წარმოსაჩენად მშვიდობიანი ფორმით. ნებისმიერი სახელმწიფო და ქვეყნის ლიდერი პატივს მიაგებს საკუთარ გამოჩენილ სპორტსმენს თუ ადამიანს, რომელიც სამშობლოს სახელს მსოფლიო ასპარეზზე გაიტანს. საქართველოს წარმატებულ ჩემპიონებთან პრემიერის შეხვედრა ნიშნავს იმას, რომ მათ საქმიანობას სახელმწიფო აღიარებს. ამიტომ პოლიტიკურ ძალებს მოვუწოდებთ, ნუ აქცევენ ჩვენი ქვეყნის სიამაყეს, პლანეტის უძლიერეს ძალოსანს პოლიტიკური თამაშების სამიზნედ. დიდი მადლობა ჩვენი ძალოსნების გულშემატკივრებს, თქვენი მხარდაჭერა უდიდესი სტიმული და მოტივაციაა მომავალი გამარჯვებებისთვს, რომელსაც მალე ტოკიოს 2020 წლის ოლიმპიურ თამაშებზე ვიზეიმებთ“, - ნათქვამია განცხადებაში.
შეგახსენებთ, რომ გიორგი გახარიამ ქართველ სპორტსმენებს უმასპინძლა, მათ შორის იყო ლაშა ტალახაძეც. საზგადოების ნაწილმა გახარიასთან შეხვედრის გამო ტალახაძე მკაცრად გააკრიტიკა.
დახურვა