„ევროპული საქართველოს“ წევრმა ელენე ხოშტარიამ „ფორმულასთან“ საუბარში „ქართუს“ საქმეზე ნიკა მელიასთვის გამოტანილი განაჩენი შეაფასა და განაცხადა, რომ საქმეში პოლიტიკური ინტერესია. ხოშტარიას თქმით, „ნაციონალური მოძრაობის“ ლიდერი, ნიკა მელია პარლამენტში მმართველი პარტიის თავმჯდომარეს ბიძინა ივანიშვილის დიდ დისკომფორტს უქმნის.
„არც ერთ საქმეზე რეალურად არ დაუდგენიათ რეალური სიმართლე. აქ არის პოლიტიკური ინტერესი. ახლა ივანიშვილს აწყობს, რომ მელია გაუშვას პარლამენტიდან, რადგან დიდ დისკომფორტს უქმნის. ეს ნიშნავს, რომ ივანიშვილი სუსტია. მას სხვა იარაღი არ დარჩა. ნიკა მელიას ეს არ გააჩერებს და არც სხვას გააჩერებს. ზუსტად იგივე ბრძოლა გაგრძელდება, ივანიშვილთან ბრძლა, როგორც აქამდე. არ ვამბობ, რომ არც ერთი საქმე არაა გამოსაძიებელი, რაც წინა პერიოდში იყო, მაგრამ იმ საქმეებშიც პოლიტიკური საფუძველი იყო. ყოველ ჯერზე ნაჯახი ერტყმევა ამ სასამართლოს“, - აცხადებს ხოშტარია.
შეგახსენებთ, რომ სასამართლომ ბანკი „ქართუს“ საქმეზე „ნაციონალური მოძრაობის“ ლიდერი ნიკა მელია ნაწილობრივ გაამტყუნა. მოსამართლემ გადაწყვეტილება რამდენიმე წუთის წინ გამოაცხადა. მელიას მოსამართლემ 25 000-ლარიანი ჯარიმის გადახდა დააკისრა. გარდა ამისა, მელია ორი წლის განმავლობაში ვერ შეძლებს თანამდებობის დაკავებას და შეუწყდება საპარლამენტო მანდატი.
რაც შეეხება ზურაბ ადეიშვილის ნაწილს - მოსამართლის გადაწყვეტილებით, მელიამ არ იცოდა, რომ ბანკი „ქართუს“ გაკოტრება იგეგმებოდა და არ ყოფილა წინასწარი შეპირება.
„ქართუს“ საქმე 2012 წელს დაიწყო. 7 წლის წინ შინაგან საქმეთა სამინისტროში გამართულ ბრიფინგზე განაცხადეს, რომ ხელისუფლების მაღალჩინოსნები, პოლიტიკაში ჩართული ბიძინა ივანიშვილის ანგარიშსწორების მიზნით, ბანკის გაკოტრებას გეგმავდნენ. კერძოდ, მოქმედებდა ორგანიზებულ-დანაშაულებრივი სქემა, რომელშიც პოლიტიკური თანამდებობის პირები მონაწილეობდნენ. მათ შორის იყო იუსტიციის ყოფილი მინისტრი, ზურაბ ადეიშვილი.
პროკურატურის ინფორმაციით, შემუშავდა საკანონმდებლო ცვლილებები, რომლის თანახმადაც საგადასახადო დავალიანების აღმოჩენის შემთხვევაში ფინანსთა სამინისტროს უფლება ეძლეოდა აუქციონის წესით გაეყიდა იურიდიული პირების ქონება, მიუხედავად იმისა, ამ ფირმას გააჩნდა თუ არა ბანკის ვალი. ხოლო, აღსრულების ეროვნული ბიუროს იმისთვის, რომ ბანკი '"ქართუს" ქონება გონივრულ ფასში არ გამოესყიდათ, აღსრულების ეროვნული ბიუროს ხელმძღვანელის, ნიკა მელიას ხელმძღვანელობით აუქციონს შლიდნენ. შედეგად, აღსრულების ეროვნული ბიურო ქონებას ეკონომიკის სამინისტროს გადაცემდა.