"თუ მესტიაში კორონავირუსი თბილისიდან აიტანეს, მაშინ რატომ ვკეტავთ მესტიას და არა თბილისს?" - ამის შესახებ გირჩის ლიდერმა, ზურაბ ჯაფარიძემ გადაცემაში "გიორგი თარგამაძის ფორმულა" ისაუბრა. ჯაფარიძის თქმით, თბილისში მოსახლეობის სიმჭიდროვე მეტია, მესტიაში კი ადამიანები ერთმანეთთან დაშორებულები ცხოვრობენ.
"ზოგადად ვფიქრობ, რომ სიგიჟეა ეს ყველაფერი. იმ ფონზე, როცა ვსაუბრობთ, რომ შიდა ტურიზმი უნდა განვითარდეს, გარედან ტურისტებს არ უშვებ, რადგან ფრენები გაქვს აკრძალული, მათ შორის, როცა 24 ივლისს დიდის ამბით დააანონსეს ფრენები გავხსენითო და ახლა მესტიას კეტავ, ამას ახსნა არ აქვს. ეს ვირუსი არსად წასულა, ეს ვირუსი არსებობს. ილუზიაა იმის დაჯერება, რომ ეს ხელისუფლება ვერაფერს ართმევს თავს, უცებ ეფექტიანად გააქრო ვირუსი და გადაგვარჩინა. რაიონების შერჩევითად ჩაკეტვა, პირობითად, არის ის რომ ტონუსში გვამყოფებენ რომ არ მოვდუნდეთ", - ამბობს ზურაბ ჯაფარიძე.
შეგახსენებთ, ბოლო დღეებში კორონავირუსის შემთხვევების მატების გამო, მესტიის მუნიციპალიტეტში შეზღუდვები დაწესდა.
როგორც მთავრობის ადმინისტრაციაში გამართულ ბრიფინგზე უწყებათაშორის საკოორდინაციო საბჭოსთან არსებული საოპერაციო შტაბის უფროსმა, ალექსანდრე ხოჯევანიშვილმა განაცხადა, გადაადგილება იზღუდება როგორც მესტიის მუნიციპალიტეტის მიმართულებით, ასევე მესტიის მუნიციპალიტეტიდან. გარდა ამისა, წესდება შეზღუდვები დაბა მესტიასა და დაბა მესტიის სოფლებს შორის.
დახურვა