ლელოს ლიდერი, ბადრი ჯაფარიძე ამბობს, რომ პარლამენტში შესვლა არ განიხილება ქართულ ოცნებასთან პოლიტიკური შეთანხმების გარეშე. აშშ-ს ელჩის რეზიდენციაში შეხვედრის შემდეგ მან ჟურნალისტებთან განმარტა პოლიტიკური შეთანხმების შინაარსი, რომელიც ახლა პაკეტის სახით აქვთ წარდენილი მოლაპარაკებებზე.
"ჩვენი ელჩები ყველაფერს აკეთებენ, რათა გაგრძელდეს მოლაპარაკებები ოპოზიციასა და ხელისუფლებას შორის. ძალიან საინტერესო საუბარი გვქონდა. ოპოზიციის პოზიციაა, რომ ჩვენ გვსურს პოლიტიკური შეთანხმება ქართულ ოცნებასთან, რაც მოიცავს: ახალ არჩევნებს, ცვლილებებს ცესკოში, საარჩევნო კანონმდებლობაში, ასევე, იქ არის პოლიტიკურ დევნასთან დაკავშირებული საკითხები.
ეს არის პაკეტი, რაც გვსურს ვაქციოთ პოლიტიკურ შეთანხმებად. პარლამენტში შესვლა არ განიხილება, თუ არ არსებობს პოლიტიკური შეთანხმება", - განაცხადა ბადრი ჯაფარიძემ.
მანვე აღნიშნა, რომ ელჩების ინტერესი, მოხდეს შეთანხმება, მიუთითებს იმაზე, რომ ოპოზიციის მოთხოვნების შესრულება ქართული ოცნებისთვის შეუძლებელი არაა.
დღეს, 25 ნოემბერს ოპოზიციური პარტიები აშშ-ის ელჩს ინდივიდუალურად ხვდებიან. განხილვის საგანი საპარლამენტო არჩევნები, ოპოზიციის ბოიკოტი და მისი ხელახლა ჩატარების მოთხოვნაა.
ჯერჯერობით უცნობია, როდის გაიმართება შეხვედრების მესამე რაუნდი ხელისუფლებას და ოპოზიციას შორის.
ოპოზიციური პარტიები 31 ოქტომბრის არჩევნების შედეგებს გაყალბებულად მიიჩნევენ და პარლამენტში შესვლაზე უარს ამბობენ. მათ ბოიკოტი გამოუცხადეს არჩევნების მეორე ტურსაც, რომელიც 17 მაჟორიტარულ ოლქში შედგა და მხარდამჭერებსაც სახლში დარჩენისკენ მოუწოდეს.
როგორც ოპოზიციის, ისე არასამთავრობო ორგანიზაციების დაკვირვებით, არჩევნების გაყალბების მასშტაბი იმდენად დიდია, რომ ის მნიშვნელოვან გავლენას მოახდენდა არჩევნების შედეგებზე.
ოპოზიცია ითხოვს ხელახალი საპარლამენტო არჩევნების ჩატარებას ახალი საარჩევნო ადმინისტრაციის პირობებში, ისევე, როგორც პოლიტპატიმრების გათავისუფლებას.
ამ მოთხოვნებით გაიმართა საპროტესტო აქციები. მათგან ერთი, ქართული ოცნების ხელისუფლების გადაწყვეტილებით, სპეცრაზმმა წყლის ჭავლის გამოყენებით დაშალა, რის შედეგადაც მომიტინგეები და მედიის წარმომადგენლები დაშავდნენ.
აშშ-ის და ევროკავშირის საელჩო ოპოზიციას მოუწოდებენ, პარლამენტში შევიდნენ, ვინაიდან მათთვის ერთპარტიული პარლამენტია მიუღებელი. თუმცა, ოპოზიციის წარმომადგენლები თავიანთ მოთხოვნებსა და გადაწყვეტილებაზე უარის თქმას არ აპირებენ და კვლავ ითხოვენ სამართლიანად ჩატარებულ არჩევნებს.
ირმა ინაშვილმა აშშ-ის ელჩთან შეხვედრის შემდეგ თქვა, რომ პატრიოტთა ალიანსი პარლამენტში შესვლას არ გეგმავს და რომ მათი მოთხოვნა უცვლელია - დაინიშნოს ხელახალი არჩევნები.
ინაშვილი ამბობს, რომ ამის საგარანტიოდ 8 მარტის ტიპის შეთანხმებას ითხოვს. მისი განცხადებით, წინააღმდეგ შემთხვევაში ჟურნალისტების რიგებში დაბრუნდება.
"ჩვენი პარტიის პოზიცია უცვლელია. ჩვენ ვითხოვთ, დაინიშნოს ხელახალი არჩევნები. ცვლილებები ცესკოში და სხვა მიბმულია ამ საკითხთან - ახალი არჩევნების დანიშვნასთან. ამაში არის გამოსავალი.
ჩემთვის შეთანხმება და შედეგი იქნება ახალ არჩევნებზე შეთანხმება. ჩემი პარტია და მე არ ვაპირებთ პარლამენტში შესვლას, სანამ არ იქნება მკაფიოდ გამოხატული არა მარტო პოზიცია, არამედ 8 მარტის ტიპის შეთანხმება უნდა შედგეს, მემორანდუმი, ძალიან მყარი გარანტიებით ჩვენი საერთაშორისო პარტნიორების, რომ ინიშნება ახალი არჩევნები. ამის შემდეგ ვისაუბრებთ სხვა ცვლილებებზე: ცესკოს ადმინისტრაციის შეცვლაზე თუ სხვა. თუ ასეთი მკაფიო შეთანხმება არ შედგება - მე პარლამენტში შევედი ქუჩიდან, ქუჩის საპროტესტო აქციები, ძალიან დიდი ბრძოლა, როგორც თქვენმა კოლეგამ, ჟურნალისტმა, გავიარე და ისევ აღმოვჩნდები თქვენს რიგებში და იქიდან დავიწყებ ბრძოლას სისტემის წინააღმდეგ", - თქვა ირმა ინაშვილმა.
დახურვა