სოციალური სამართლიანობის ცენტრი 2 ივნისს აქციაზე თეთრი ფურცლებისა და პრემიერმინისტრ, ირაკლი ღარიბაშვილის შესახებ მიტანილი ბანერების გამო დაკავებულების სამართალდამრღვევად ცნობას განცხადებით ეხმაურება.
ცენტრი მიიჩნევს, რომ გადაწყვეტილება წინააღმდეგობაშია კონსტიტუციითა და საერთაშორისო აქტებით გარანტირებული შეკრებისა და გამოხატვის თავისუფლების სტანდარტებთან.
"საპროტესტო აქციების დაშლის ხისტი და რეპრესიული მეთოდები საფრთხეს უქმნის ქვეყნის დემოკრატიულ განვითარებას, პოლიტიკურ და საზოგადოებრივ სტაბილურობას. მშვიდობიანი შეკრების მიმართ ჭარბი საპოლიციო ძალის გამოყენებას და სასამართლოს მიერ დაკისრებულ სანქციებს მსუსხავი ეფექტი აქვს გამოხატვის თავისუფლებაზე და აჩვენებს რეპრესიული სახელმწიფოს ნიშნებს", - ნათქვამია სოციალური სამართლიანობის ცენტრის განცხადებაში.
***
2 ივნისს აქციაზე თეთრი ფურცლებისა და პრემიერმინისტრ ირაკლი ღარიბაშვილის შესახებ მიტანილი ბანერების გამო დაკავებულები გუშინ სასამართლომ სამართალდამრღვევებად ცნო.
საბა ბრაჭველი, ედუარდ მარიკაშვილი, ნიკა რომანაძე და გრიგოლ ფრანგიშვილი მოსამართლე ნინო შჩერბაკოვმა ერთ მუხლში გაამართლა და მათ 500-ლარიანი ჯარიმები დააკისრა. ხოლო იმავე დღეს დაკავებული ნოდარ სიხარულიძე მან ორივე მუხლში გაამტყუნა და 2 000 ლარით დააჯარიმა.
2 ივნისს პარლამენტის წინ მიმდინარე აქციაზე პოლიციამ ბანერების გამო მოქალაქეები დააკავა. ძირითადად ამ ბანერებზე პრემიერმინისტრი ირაკლი ღარიბაშვილი იყო ნახსენები.
დაკავებულს შორის იყო საქართველოს დემოკრატიული ინიციატივის თავმჯდომარე, ედუარდ მარიკაშვილი, რომელსაც ცარიელი ფურცელი ეჭირა ხელში.
თავდაპირველად პარლამენტთან მოქალაქეები ლაზარე გრიგორიადისის მამის, ბექა გრიგორიადისის მხარდასაჭერად შეიკრიბნენ, რომელიც პირველ ივნისს კარვის გაშლის მცდელობის გამო დააკავეს. სასამართლომ ის 2000 ლარით დააჯარიმა.
მშვიდობიან აქციაზე პირველი დააკავეს ადვოკატი შოთა თუთბერიძე, რომელსაც ეჭირა ბანერი წარწერით "ირაყლი". მოგვიანებით დააკავეს, კიდევ სამი მოქალაქე, მათ შორის გირჩი - მეტი თავისუფლების წევრი. მას ასომთავრულით დაწერილი ბანერი ჰქონდა.
დახურვა